Pressemelding

Nr. 134/99
Dato: 19.11.1999

Fræna kommune:

Omstillingstilskott til utbetring av fylkesvegen Jendem – Aurosen

Regjeringa har i statsråd i dag gjort framlegg om ei løyving på 12 millionar kroner over statsbudsjettet for1999 som omstillingstilskot til Fræna kommune i Møre og Romsdal. Omstillingstilskottet skal nyttast til utbetring av fylkesveg 228 Jendem – Aurosen. Tilskotet blir gitt som ei eingongsløyving.

Utbetring av fylkesveg 228 Jendem – Aurosen var tidlegare prioritert av Møre og Romsdal fylkeskommune i samband med at Storvika i Fræna kommune var aktuell som ilandføringsbase for olje og gass. Mellom anna blei store areal i Storvika-området bandlagte til ein slik mogleg ilandføringsbase. Etter planen for ilandføring av olje og gass til Storvika skulle den som sto for utbygginga av ilandføringsbasen dekkje utgiftene til utbetring av fylkesvegstrekninga Jendem - Aurosen. Dette førte så til at fylkeskommunen ikkje lenger prioriterte utbetring av denne vegstrekninga. Tjeldbergodden i Aure kommune i Møre og Romsdal blei til slutt valt som ilandføringsbase for olje og gass, etter mange år med debatt om lokalisering.

Regjeringa viser til at det tidlegare har vore gitt omstillingstilskot, mellom anna til elleve kommunar på Helgeland i Nordland, som kompensasjon for manglande lokalisering av basefunksjon og ilandføring for Heidrunfeltet. Tilskotet blei fordelt til kommunale næringsfond og utviklingsprogram på ytre Helgeland.

Fræna kommune og Møre og Romsdal fylkeskommune meiner at ei utbetring av fylkesveg 228 vil vere den beste kompensasjonen som lokalsamfunnet kan få for tapt ilandføringsbase, går det fram av framlegget frå regjeringa.