Pressemelding

Nr. 86
Dato 3.12.97

Budstikka-prisen 1997

Samferdselsavdelinga i Hedmark fylkeskommune og Tabartun kompetansesenter i Sør-Trøndelag mottok onsdag Budstikkaprisen. Prisen vert delt ut til organisasjonar eller instansar som på eit eller anna vis har gjort sitt for at funksjonshemma får auka deltaking i samfunnet.

- Eg er glad for at eg kan føra tradisjonen med overrekking av Budstikka vidare. Det er ein viktig del av markeringa av den internasjonale dagen for funksjonshemma, sa sosialminister Magnhild Meltveit Kleppa ved overrekkinga.

I Hedmark vert det arbeidd med å få “bussane til å vera for alle.” Det starta som eit prosjekt “Bussen for alle” der representantar frå brukarorganisasjonane, fylkesrådet for funksjonshemma og NSB-Biltrafikk var med. Utviklinga frå prosjekt til ordinær praksis er i samsvar med FNs standardregler for funksjonshemma.

Ved Tambartun kompetansesenter har dei tilpassa, vidareutvikla og teke i bruk dataprogrammet STRUKTUR, såleis at barn og ungdom med Spielmeyer-Vogt syndrom får hjelp til å kommunisera også i den fasen av livet der ein tidligare hadde få eller ingen moglegheiter for kommunikasjon mellom ungdomen, familie og tenesteutøvarane.