Pressemelding

Nr. 90
Dato:18.12.97

Landsplan for Vinmonopolet

Sosial- og helsedepartementet har i dag vedteke at det kan opprettast 8 nye vinmonopolutsal i 1998.

Etter alkohollova er det Sosial- og helsedepartementet som fastset ein landsplan for Vinmonopolet. I inneverande landsplanperiode er ramma for talet på vinmonopolutsal 114. Denne ramma er no fylt.

Eit utkast til landsplan i tråd med Stortingets ynske om utbygging for perioden 1998-2002 har vore ute på høyring. - Eg ynskjer å sjå denne planen i samanheng med ein handlingsplan for redusert rusmiddelbruk som Regjeringa skal leggja fram i løpet av våren 1998, seier sosialminister Magnhild Meltveit Kleppa. - Vinmonopolet har ein viktig alkoholpolitisk funksjon i å regulera tilgjenget på alkohol, og denne funksjonen legg Regjeringa vekt på å vidareføra i den nye landsplanen.

På denne bakgrunnen har departementet i denne omgangen fastsett eit tillegg til den eksisterande landsplanen, og samtidig forlenga denne til utløpet av 1998. I tillegget har Vinmonopolet fått høve til å søkja kommunane om løyve til å etablera inntil 8 nye utsal. Vinmonopolet skal i samband med nyetableringane i 1998 syte for betre distriktsmessig tilgang til vimonopolutsal, og i tillegg løysa einskilde akutte køproblem i sentrale strok.

Sosialminister Magnhild Meltveit Kleppa er tilgjengeleg for å gi kommentarar i Stortinget etter ca. kl. 15 i dag.