Pressemelding

Nr.116
29.12.98

Framleis forbod mot sal av øl frå bensinstasjon og kiosk

Sosial- og helsedepartementet vedtok 14. desember 1998 endringar i forskrift om omsetning av alkoholhaldig drikk, slik at forbodet mot å gje salsløyve for øl til bensinstasjonar og kioskar også gjeld etter 1. januar 1999.

- Kombinasjonen alkohol og bilkøyring medfører store samfunnsmessige og individuelle skader. På same måte som ved sal av øl frå bensinstasjonar, vil sal av øl frå kioskar gjera øl meir tilgjengeleg og på ein uheldig måte bidra til å auka forbruket av øl, seier sosialminister Magnhild Meltveit Kelppa.

Aldersgrenser for kjøp og sal av vinråstoff

Samtidig har Sosial- og helsedepartementet vedteke ei ny forskrift til alkohollova som set ei aldersgrense på 18 år for kjøp og sal av vinråstoff m m frå 1. januar 1999. Forbodet omfattar råstoff som hovudsakleg blir nytta ved tilverking av eller som tilsetjing til alkoholhaldig drikk, og gjeld særleg såkalla ”rusbruspulver”, hurtigvin, vinsett og andre blandingar.