Ny handlingsplan for funksjonshemma
Historisk arkiv
Publisert under: Regjeringen Bondevik I
Utgiver: Sosial- og helsedepartementet
Pressemelding | Dato: 09.10.1998 | Sist oppdatert: 21.10.2006
Pressemelding
Nr. 79
Dato 09.10.98
Ny handlingsplan for funksjonshemma
- Manglande tilrettelegging av samfunnet gjer at langt fleire opplever hindringar i si livsutfolding enn kva sjølve funksjonshemminga skulle tilseie. Samfunnet i seg sjøl verkar funksjonshemmande. Regjeringa sin handlingsplan har hovedfokus på auka deltaking, seier sosialminister Magnhild Meltveit Kleppa.
Stortingsmeldinga Om handlingsplan for funksjonshemma for perioden 1998 – 2001 har som overordna mål full deltaking og likestilling for funksjonshemma. Auka tilgjenge, planlegging og brukarmedverknad, funksjonshemma sine rettar og auka yrkesaktivitet blant funksjonshemma, er viktige satsingsområder i handlingsplanen. 143 tiltak er omtala i handlingsplanen som gjeld 10 departement sine område. I budsjettet til SHD er det gjort framlegg om løyving av 114 mill til gjennomføring av handlingsplanen. Dette er 66 mill meir enn i 1998-budsjettet.
- Regjeringa byggjer sitt menneskesyn på at alle menneske er like verdifulle og har same menneskeverd. Menneske med funksjonshemming har same grunnleggjande behov som andre. Det er ikkje behova, men løysingane som er annleis. Voksenåsen-erklæringa slår fast at regjeringa vil arbeide for å styrkje funksjonshemma sine kår og rettar, og for at alle, ut frå eigne føresetnader må få same høve til å delta i aktivitetar i samfunnet, seier Kleppa.
- Eit meir tilgjengeleg samfunn forutset auka kjennskap og kompetanse om funksjonshemma sine rettar, behov og mogelegheiter. Dei fleste folkevalde kan ikkje byggja på eigne røynsler. Vi ynskjer samarbeid med funksjonshemma og deira organisasjoner for å utforme eit samfunn for alle. Det er viktig at det blir meir kunnskap blant alle som ikkje er funksjonshemma enno, såleis at fleire skjønar at det er viktig å skipa eit samfunn for alle, seier sosialministeren.
- Eg meiner vi har kome for kort i arbeidet med å gjera tilrettelegging for funksjonshemma til ein naturleg del av samfunnsplanlegginga. Det må vere ein sammenhengande planprosess frå den overordna, langsiktige samfunnsplanlegginga til dei konkrete løysingane, seier Kleppa.
Handlingsplan inneheld fire satsingsområde:
- eit tilgjengeleg samfunn
- planlegging og brukarmedverknad
- funksjonshemma sine rettar
- yrkesaktivitet for funksjonshemma
Gjennomføringa av planen skal følgja sektoransvarsprinsippet. Det inneber at det er dei vanlege instansar i samfunnet som skal gi tilbod som funksjonshemma kan nytta på lik linje med befolkninga elles. Det er dei same instansar som, ved behov, skal supplera med særskilte ordningar dersom dei ordinære ordnigane ikkje er tilstrekkelege. Planen vil og bli nytta til å føra vidare arbeidet med å setja i verk FN sine standardreglar for like vilkår for funksjonshemma i Noreg.
Tiltak, finansiering og oppfølging
Viktige nye tiltak er:
- offentleg utval som skal sjå på funksjonshemma sine rettar i ein større samanheng
- lovfesting av tilbod om brukarstyrt personleg assistanse
- eigen handlingsplan for auka yrkesaktivitet for funksjonshemma
- handlingsplanar for fuksjonshemma ved universitet og høgskular
I tråd med sektoransvarsprinsippet har regjeringa valt å leggja ein stor del av plantiltaka innan den ordinære verksemda til departementa. I tillegg kjem framlegg om løyving av 114 mill over SHD sitt budsjett til gjennomføring av handlingsplanen til funksjonshemma. Eit statssekretærutval skal sikra ei løpande koordinering mellom departmenta i deira arbeid med den samla politikken for funksjonshemma. Stortinget vil bli gjort kjend med oppfølginga av planen gjennom ei årleg rapportering i samband med St prp nr 1.
St meld nr 8 (1998-99) Om handlingsplan for funksjonshemma kan tingast frå:
Statens trykksakekspedisjon
Postboks 8169 Dep.
0032 Oslo
Telefaks: 22 24 27 86
Internett: ste-bestilling@ft.dep.telemax.no
Meldinga ligg føre på lydkassett (I- 0928 N) og vil om kort tid kome i punktskrift (I-0929 N), storskrift (I-0930 N ) og på teiknspråkvideo (I-0931N).
Planen er også tilgjengelig på Internett adresse: linkdoc030005-990592#docodin.dep.no/shd/publ/publ.html
Kontaktpersoner:
Rådgjevar Inge Ovesen, tlf. 22 24 85 72
Rådgjevar Gerd J. Homstvedt tlf. 22 24 83 83