Pressemelding

Nr. 31
Dato 03.04.98

Rettstryggleik for psykisk utviklingshemma

Regjeringa la i dag fram ei stortingsmelding om avgrensing og kontroll av tvang og makt overfor personar med psykisk utviklingshemming. Meldinga er ei oppfølging av tidlegare lovvedtak i Stortinget.

- Eg har lagt vekt på at alternative tiltak til bruk av tvang alltid skal vere utprøvd. Det er og viktig å få ein gjennomgang av rammeplanar innan ulike utdanningar for å styrkje pedagogiske metodar og tilnærmingsmåtar som ikkje inneber bruk av tvang, seier sosialminister Magnhild Meltveit Kleppa.

Meldinga gjer særleg greie for innhaldet i forskrifta som set krav til frivillige tiltak og grenser for bruk av tvang og makt. Vidare blir det omtala ulike tiltak for å sikre rettstryggleiken, mellom anna arbeidet med å utarbeide alternative tiltak og å styrkje kompetansen til tenesteytarane.

Stortinget vedtok våren 1996 endringar i sosialtenestelova og kommunehelsetenestelova. Siktemålet med lovendringa var å forby bruk av tvang og makt som ikkje er strengt nødvendig i omsorgstenestene til personar med psykisk utviklingshemming, og å gje strenge rettstryggleiksgarantiar for den bruken av tvang som må aksepterast.

Samstundes med at lova vart vedteken vart regjeringa beden om å leggje fram ei stortingsmelding med nærare retningsliner for praktiseringa av lova og hovudinnhaldet i forskriftene til lova, før lova blir sett i verk.

Departementet gjer i stortingsmeldinga greie for det arbeidet som er gjort for å sikre oppfølging av intensjonane til Stortinget og for utkast til forskrifter, rundskriv og høyringsinstansane sitt syn på desse.

Kontaktperson

Underdirektør Anders Haugland, tlf 22 24 85 16