Pressemelding

Nr.: 47
Dato: 10.05.1999

- Styrking av eldreomsorga og klar sosial profil i revidert budsjett

Regjeringa foreslår å auke utbyggingstakta i eldreomsorga. Ramma for tilskot til sjukeheimar og omsorgsbustader foreslås auka frå 3.700 einingar til 5.800 einingar.

I revidert nasjonalbudsjett får tiltak til behandling av rusmiddelmisbrukarar ti millionar kroner meir. Tilskotet til kommunar som vil skrive ut unge funksjonshemma frå aldersinstitusjon aukar, og vertskommunetilskotet for tidlegare HVPU-institusjonar aukar med 18 millionar kroner.

Styrking av eldreomsorga

-- Regjeringa følgjer no opp styrkinga av eldreomsorga og den satsinga som pågår i kommunane. Vi foreslår å auke investeringstilskota slik at vi kan gi tilsegn om bygging av 5.800 omsorgsbustadar og sjukeheimsplassar både i år og neste år, seier sosialminister Magnhild Meltveit Kleppa.

Regjeringa har i revidert nasjonalbudsjett for 1999 foreslått å auke tilsegnsramma for tilskot til bygging av omsorgsbustader og sjukeheimsplassar frå 3.700 til 5.800 einingar under kapittel 586 i Kommunal- og regionaldepartementet sitt budsjett. Det er foreslått å føre denne auken vidare neste år. Det er gjort ut frå søknadsinngangen til Husbanken og ut frå kommunane sine planar for nye sjukeheimar og omsorgsbustader.

10 nye millionar til rusmiddelomsorg

-- For å kunne gje tilbod om metadonbehandling til 600 rusmiddelmisbrukarar innan utgangen av året, foreslår vi å auke løyvinga med 7,6 millionar til dette føremålet i år. I vinter fikk om lag 280 personer metadonbehandling, men vi tek sikte på ei jamn utbygging av tilbodet fram mot årsskiftet, seier sosialminister Magnhild Meltveit Kleppa. I tillegg foreslår regjeringa å løyve 2,6 millionar til forsøk med buprenorfinbehandling for om lag 150 rusmiddelmisbrukarar i år. Vi tek sikte på at forsøket kan starte opp i august/september.

Unge funksjonshemma ut av institusjon

Framleis bur det ca. 160 fysisk funksjonshemma under 67 år på alders- og sjukeheimar som ønskjer tilbod om eigen bustad. For å få fortgang i kommunane sitt arbeid med å skaffe desse personane et butilbod, foreslår regjeringa å auke tilskotet til kommunar som skaffar individuelle butilbod i 1999, frå 600.000 til 1.000.000 kroner. Forslaget vil kunne finansierast innanfor vedtekne løyvingar for 1999.

Vertskommunetilskot

Vertskommunar for tidlegare HVPU-institusjonar har meirutgifter knytte til lønnsutgifter for kommunale tenester til psykisk utviklingshemma som ikkje blir dekt gjenom løyvinga for 1999. Til å dekkje desse utgiftene er det forslag om auke det såkalla vertskommunetilskotet med 18 millionar.

Rett til sjukepengar

Minsteinntektsgrensa for å få sjukepengar frå folketrygda vart heva frå 1/2 til 1 1/4 G frå 1. januar 1999. Regjeringa varslar i revidert nasjonalbudsjett at denne grensa for rett til sjukepengar vil bli nedjustert i budsjettet for 2000.