Pressemelding

Nr.: 120
Dato: 03.12.1999

Bodstikka 1999 til Telenor Bedrift

I dag, 3. desember, er det FN sin internasjonale dag for funksjonshemma. Dagen blir mellom anna markert ved at Sosial- og helsedepartementet og Statens råd for funksjonshemma deler ut prisen Bodstikka til Telenor Bedrift for deira handikapprosjekt. Prosjektet fokuserer på tilhøva for funksjonshemma i arbeidslivet.

Telenor Bedrift får overrekt Bodstikka av fjorårets prisvinnar, NRK fjernsynet.

- Det gler meg at bedrifter tek attføringsarbeid på alvor og ser nytten av det. Eg ynskjer Telenor Bedrift sitt handikap-prosjekt til lukke med prisen, og håpar han vil inspirere til å halde fram og vidareutvikle tilbodet inn det nye årtusenet, seier sosialminister Magnhild Meltveit Kleppa.

Bodstikka-prisen går til ein kommune/organisasjon/bedrift som kan rosast for godt tilgjenge for funksjonshemma i nærmiljøet, eller som på anna vis aktivt arbeider for å betre funksjonshemma sine høve til deltaking og likestilling i samfunnet.

Handikap-prosjektet vart starta opp av April Data A/S i 1994. I januar 1996 overtok Telenor Bedrift prosjektet. Det blir sett på som ein av fleire viktige rekrutteringskanalar til bedrifta. Prosjektet inneheld eit intensivkurs over tre månader. Deretter ein 21 månader lang praksis- og opplæringsperiode i brukarstøttesenteret på Telenor Bedrift.

Attføringsresultata i prosjektet er gode. I alt 27 personar har delteke. Dei fleste som har vore innom er komne i fast jobb.

Regjeringa sin handlingsplan for funksjonshemma 1998-2001 har full deltaking og likestilling som hovudmål. Eit av fire satsingsområde i handlingsplanen er auka yrkesaktivitet blant funksjonshemma. -Å leggje til rette for utdanning og deltaking i arbeidslivet, er eit svært viktig område for å sikre menneske med funksjonshemming ut frå eigne føresetnader deltaking i samfunnet på lik linje med andre, seier sosialministeren.

Kontaktperson:
Førstekonsulent Georg H. Antonsen, tlf. 22 24 85 68