Pressemelding

Nr.: 75
Dato: 21.07.1999

Døvetolk på arbeidsplassen

Sosial- og Helsedepartementet skal setje i gang prøveordning med fleksibel tolketeneste på arbeidsplassen. To arbeidsplassar med fleire høyrslehemma tilsette har fått tilbod om å delta i forsøket.

-Tilgang til tolk er ein føresetnad for at døve skal kunne delta aktivt i samfunnet og dermed oppnå målsetjinga om full deltaking og likestilling. Målet med forsøket er å finne ordningar som set høyrslehemma i stand til å utføre arbeidet sitt på lik linje med høyrande, seier politisk rådgjevar i Sosial- og helsedepartementet, Liv Signe Navarsete.

Døve arbeidstakarar kan få dekka utgifter til tolkehjelp for å fungere i arbeid med inntil 90 timar per kvartal. Prøveordninga med fleksibel tolketeneste vil innebere at arbeidsplassen kan tilsetje folk i fast stilling innafor det timetalet dei døve tilsette totalt sett har rett til.

-Det medfører at dei tilsette gir sin individuelle rett til tolking i arbeid til ein ”fellespott” for arbeidsplassen. Den individuelle retten blir slik kollektivisert i forsøket. Dette vil bety at tilsette kan nytte tolk etter behov. Konsekvensen vil vere at nokre vil ta ut tolk meir enn 90 timar per kvartal, medan andre vil ta ut mindre, trur Navarsete.

Arbeidsgjevar har ansvaret for å halde seg innafor det tildelte taket (tal stillingar), og vil ha eit ansvar for fordele tolkehjelpa likeverdig i høve til det den enkelte tilsette har trong for. Midlar tilsvarande dei tilsette sin rettar, vert tildelt arbeidsplassen over trygda.

Kontaktperson:
Rådgjevar Grete Hjermstad, tlf. 22 24 86 04