Pressemelding

Dato: 26. mars 1999

Endringar i folketrygdlova

Regjeringa la i statsråd i dag fram forslag til fleire endringar i folketrygdlova og i enkelte andre lover. Forslaga gjeld blant anna førehandsbetaling av eigendelar for helsetenester og pensjonspoeng for omsorgsarbeid.

1. Heimel for forsøk med førehandsbetaling av eigendelar for helsetenester

Rikstrygdeverket får høve til å setja i verk forsøk der brukarar av helsetenester på førehand kan betala eigendelar for helsetenester i byrjinga av året. Formålet er å forenkle betalingsordninga for personar som veit at dei vil nå opp til eigendelstaket, og som deretter får frikort.

Eigendelsordninga er i dag administrativt ressurskrevjande. Etter forslaget om førehandsbetaling av eigendelar, vil brukarar av helsetenester ikkje ha behov for å få påført betalte eigendelar i kvitteringskortet, ta vare på lause kvitteringar eller å gå på trygdekontoret for å få frikort når eigendelstaket er nådd. Trygdekontora vil dermed og få mindre arbeid med eigendelsordninga. Forsøksordninga vil etter forslaget bli prøvd ut i tre-fire kommunar inkludert ein bykommune. Det viktigaste siktemålet med forsøket er å kartleggja praktiske og administrative konsekvensar for brukarar, trygdekontor og behandlarar. Departementet foreslår at lovheimelen for forsøk trer i kraft 1. januar 2000.

2. Pensjonspoeng for ulønt omsorgsarbeid.

Det blir foreslått at det skal kunna gjerast unntak frå kravet om seks månader med omsorgsarbeid per kalenderår i høve der langvarig omsorgsarbeid blir avslutta.

Pensjonspoeng i folketrygda for ulønt omsorgsarbeid er ei kompensasjonsordning for personar som har vore ute av arbeidslivet på grunn av omsorgsoppgåver i minst seks månader i kalenderåret. Unntaket som no er foreslått, skal berre omfatta langvarig omsorgsarbeid som blir avbrote på grunn av flytting til institusjon eller dødsfall. Eldre kvinner som har pleidd sin mannen eller foreldra, vil ha kort tid igjen av yrkesaktivt liv. Det vil derfor vera lite aktuelt for dei å få seg eit arbeid etter at pleieforholdet blir avslutta. Det blir foreslått at lovendringa skal tre i kraft straks, og bli gitt verknad frå inntektsåret 1998.

3. Fastsetjing av inntektsnivå før uførleik for sjølvstendig næringsdrivande

Sjølvstendig næringsdrivande som har hatt reduserte inntekter på grunn av sjukdom i ei tid før sjølve uførleikstidspunktet, vil i dag få lagt til grunn ein lågare attverande inntektsevne enn om vedkomande ikkje hadde vore sjuk før uførleikstidspunktet. Departementet foreslår at dersom sjukdomen har redusert inntektsevna gradvis over fleire år, blir det tatt utgangspunkt i gjennomsnittleg inntekt for dei tre siste kalenderåra før sjukdomen oppstod. Ein tilsvarande regel gjeld for arbeidstakarar.

4. Endringar i lov om anke til Trygderetten

Dei viktigaste forslaga til endringar er:

• Innføring av ein søksmålsfrist på seks månader for domstolshandsaming av Trygderetten sine avgjerder
• Oppheving av ordninga med at Trygderetten ikkje kan prøva det faktiske grunnlaget for trygdeetaten sine vedtak i klagesaker
• Lekmannsutvala i trygderetten blir slått saman til eitt utval
• Innføring av kjønnsnøytrale nemningar

Kontakpersoner:

Avdelingsdirektør Elfriede Børsum, tlf. 22 24 86 05
Førstekonsulent Gry Westad Brandshaug, tlf. 22 24 86 09