Pressemelding

Nr.: 107
Dato: 15.10.1999

Forsøk med utvida eigenmelding

Regjeringa foreslår forsøk med utvida eigenmeldt sjukefråvær og pensjonspoeng for kvinner i forsvaret. Forslaga blei lagt fram i statsråd i dag, og er to av fleire forslag til endringar i folketrygdlova og i enkelte andre lover.

-Forslaget om forsøk med utvida høve til eigenmeldt sjukefråvær inneber at arbeidstakaren tek større ansvar for eigen sjukdom. I forsøket skal arbeidstakaren få rett til eigenmeldt sjukefråvær i opptil fire veker. For å få ned sjukefråværet er det nødvendig å tenkja nytt og prøva nye ordningar, seier sosialminister Magnhild Meltveit Kleppa (Sp).

-Ei anna viktig endring er forslaget om at kvinner som tek førstegongsteneste i forsvaret, no blir likestilt med menn ved at dei får pensjonspoeng for tenesta si, seier sosialministeren .

1.Lovheimel for forsøk med m.a. eigenmeldt sjukefråvær

Folketrygdlova inneheld heimel for departementet til å samtykkja i avvik frå reglane i lova i samband med bestemte former for forsøksverksemd. Det er gjort framlegg om å utvida heimelen til å omfatta m.a. forsøk med eigenmeldt sjukefråvær. Formålet med slik forsøksverksemd er å prøva ut ei ordning der arbeidstakaren tek større ansvar for eigen sjukdom, og om eit slikt tiltak kan medverka til lågare sjukefråvær. Ordninga har som føresetnad eit nært samarbeid mellom arbeidstakaren og arbeidsgjevaren, og kan medverka til at det blir sett i gang aktive tiltak på arbeidsplassen på eit tidleg tidspunkt. Forsøket er tenkt gjennomført for kommunalt tilsette i ein større kommune med ein tilsvarande kommune som kontrollgruppe.

2.Medrekning av pensjonspoeng ved uførepensjon etter utført førstegongsteneste

For at uførepensjonistar skal kunne få full opptent tilleggspensjon på 40 år i folketrygda, får dei fastsett pårekna framtidige pensjonspoeng fram til 67 år ut frå tidlegare arbeidsinntekt, vanlegvis basert på eit gjennomsnitt av dei tre siste åra. Den som avtener sivil eller militær førstegongsteneste, det vil seie pliktig teneste, får lagt til grunn minst 2 poengtal for dette året og er dermed sikra at året blir rekna med som grunnlag for framtidige poengtal. Det er no foreslått at ordninga blir utvida, slik at også kvinner som gjer frivillig førstegongsteneste blir sikra same rett til poengtal.

3.Rett til rehabiliteringspengar under aktivisering hos annan enn eigen arbeidsgjevar i særskilde tilfelle

Eit av vilkåra for rett til rehabiliteringspengar er at medlemmet får aktiv behandling med utsikt til å betra arbeidsevna. Tidsavgrensa aktivisering og arbeidstrening hos eigen arbeidsgjevar blir likestilt med behandling. Det blir foreslått rett til rehabiliteringspengar under aktivisering og arbeidstrening hos annan enn eigen arbeidsgjevar i særskilde tilfelle. Føremålet er å gje høve for auka fleksibilitet i nokre av tilfella kor behandlingsapparatet eller brukaren sjølv har skaffa arbeidstreningsplass.

Regjeringa foreslår at endringane trer i kraft frå 1. januar 2000.

Kontaktperson:
Ekspedisjonssjef Bjørn Halvorsen 22248600
Avdelingsdirektør Aase Rokvam 22248624