Pressemelding

Nr.: 85
Dato: 23.08.1999

Handlingsplan for eldreomsorga - status og plantal

Handlingsplanen blei vedteken i Stortinget våren 1997 og sett i verk frå januar 1998. Sosialministeren gjer i dag greie for status etter 18 måneder.

Gir gode resultat

Sosialminister Magnhild Meltveit Kleppa vurderer resultata etter 18 månader som svært tilfredsstillande. - Handlingsplanen blei sett fort i gang, og kommunane har raskt teke utfordringa. Resultatet så langt viser at kommunane har følgt opp stortingsvedtaket og prioritert å styrkje eldreomsorga. Det er eg svært fornøgd med, seier sosialministeren.

Resultata av handlingsplanen første året:

• Bemanninga i pleie- og omsorgstenestene auka med over 3.000 nye årsverk.
• Det er gitt tilsegn om bygging/utbetring av 5.616 nye sjukeheimsplassar og omsorgsbustader.
• 4.165 omsorgsbustader og sjukeheimsplassar er ferdig bygde/utbetra allereie første året, og har ført til at kapasiteten har auka med 2.300 plassar/bustader.
• Talet på einerom i institusjon har stige frå 83 til 84%, og plassane i sjukeheimar har auka med 473 frå 1997 til 1998. Førebels tal for første halvår 1999 viser at utbyggingsaktiviteten aukar, og at talet på sjukeheimsplassar blir høgare enn i 1998.

- Det er ei viktig målsetjing i handlingsplan at kommunane innan 2003 kan tilby einerom til alle som bur på sjukeheim, seier sosialministeren. Resultata så langt viser ei positiv utvikling, men vi reknar med at verkemidla i handlingsplanen slår sterkare ut seinare i planperioden.

Høge kommunale plantal

- Investeringsplanane i kommunane ligg ein god del høgare enn det pårekna utbyggingsbehovet i handlingsplanen. Likevel tyder erfaringane så langt på at det faktiske utbyggingsnivået i kommunane kjem til å liggja lågare enn i planane, og at utbygginga skjer noko seinare. Derfor meiner eg det framleis er rimeleg å leggja handlingsplanen til grunn for det vidare arbeidet, med eit behov for 24.400 nye omsorgsbustader og sjukeheimsplassar i perioden 1998 –2001, seier sosialminister Magnhild Meltveit Kleppa.

Kommuneplanane for 1998-2001 ser slik ut:

• 28.700 sjukeheimsplassar og omsorgsbustader er planlagd bygde, og vel 5.000 plassar og bustader er planlagd utbetra
• av dette går 9.700 plassar/ bustadar med til å skifte ut gammal bygningsmasse og gjennomføra ”eineromsreforma”
• kapasitetsauken blir etter dette 19.000 nye bueiningar, ¼ av desse er sjukeheimsplassar og ¾ omsorgsbustader
• På driftssida er det godt samsvar mellom handlingsplan og kommunale planar med ein gjennomsnittleg bemanningsauke på 3.000 årsverk per år.

- Når det gjeld nytt personell, planlegg kommunane i tråd med handlingsplanen. Men det blir framleis ei viktig utfordring å sikra rekrutteringa til pleie- og omsorgstenestene. Vi ser at dei slit med dette fleire stader, mellom anna i Oslo. Men så langt har vi altså for heile landet klart å oppfylla målet om 3.000 nye årsverk kvart år.

Variert utbyggingsmønster

- I hovudsak ser det ut til at handlingsplanen fører til mindre forskjellar mellom fylka i institusjons- og bustaddekning. Tala for dei store kommunane illustrerer likevel at vi også i det vidare arbeidet må sjå på utjamning av ulikskapar, seier sosialministeren.

• For landet under eitt inneber planane at sjukeheimsdekninga held tritt med befolkningsutviklinga og at talet på omsorgsbustader aukar vesentleg.
• Aust-Agder, Troms, Oslo og Akershus planlegg den største veksten i sjukeheimsplassar, medan Telemark ligg lågast. Tilsvarande vil auken i omsorgsbustader vera størst i Nordland, Buskerud, Sør-Trøndelag og Østfold, medan Oslo, Vest-Agder og Finnmark ligg lågast.
• Oslo, Bergen, Trondheim, Stavanger, Bærum, Kristiansand, Fredrikstad, Tromsø, Drammen og Sandnes utgjer samla omtrent 1/3 av folketalet i Noreg, men planlegg ikkje for meir enn om lag 20% av investeringsvolumet for landet samla. Trondheim, Tromsø og Drammen ligg høgast, medan Bergen ligg lågast når det gjeld kapasitetsauke.

Rapporten RESULTATER OG PLANER HPE –rapport 2/99 er tilgjengeleg på Sosial- og helsedepartementet si internettside ( linkdoc030005-990077#dochttp://odin.dep.no/shd/proj/eldre).

Kontaktperson:
Prosjektleiar Steinar Barstad 22 24 86 89 eller 91 60 58 29
Rådgivar Øyvind Brandt 22 24 85 78