Pressemelding

Nr.: 93
Dato: 22.09.1999

Høyringsnotat om attlevandepensjon

Sosial- og helsedepartementet sender i dag ut til høring tre alternative forslag til endringar i pensjonsordninga for attlevande gjennom folketrygda.

Bakgrunnen for høyringa er stortingsbehandlinga av Velferdsmeldinga i 1996. Representantane frå Arbeidarpartiet og Høgre sa mellom anna dette om attlevandepensjon: "Flertallet viser til at etterlattepensjonen ifølge regelverket skal graderes etter hvor stor inntekt man kan forvente at den gjenlevende vil skaffe seg. Lovens intensjon bør praktiseres slik at ikke etterlatte som har mulighet til arbeid, heller kan heve etterlattepensjon over mange år."

Ut frå det ønskte fleirtalet ei form for aldersgradering, slik at attlevandepensjon til yngre attlevande berre kan ytast ei viss tid. Vidare heiter det at ei eventuell endring berre skal gjelde for nye tilfelle.

Høyringsnotatet skisserer tre ulike forslag til endring:

• Ei ordning med lovbestemte krav til ei pårekna arbeidsinntekt for attlevande ektefelle under 55 år. I så fall blir det stort sett ei presisering av gjeldande rett.
• Ei tidsavgrensing av attlevandepensjon, til dømes 15 år. Det vil seie at personar yngre enn 52 år, ikkje kan basere seg på å leve heilt eller delvis av attlevandepensjon fram til dei får eigen alderspensjon ved fylte 67 år.
• Ei aldersgradering, slik at attlevandepensjonistar før fylte 40 år maksimalt kan få 60 prosent av full attlevandepensjon. Mellom fylte 40 og 60 år får ein maksimalt 80 prosent av full pensjon. Først etter 60 år blir det ytt full pensjon.

Eit vilkår er at det elles kan ytast full attlevandepensjon i ei omstillingstid på inntil eitt år etter dødsfallet. Det skal òg kunne givast full pensjon til attlevande ektefelle som har små barn under tre år, og til dei som treng utdanning for å kunne forsørgje seg sjølv.

For enkjer og enkjemenn som allereie har fått attlevandepensjon, er det forslag om rimelege overgangsreglar.

Departementet meiner forslaget med aldersgradering kan vere ei rimeleg og administrativt enkel ordning i tråd med signala frå stortingsfleirtalet.

Høyringsnotatet tek òg opp spørsmål om bortfall av attlevandepensjon frå folketrygda når vedkommande før 67 år samtidig får eigen førtidspensjon, slik ordninga i dag er for dei som får avtalefesta pensjon (AFP). Departementet meiner likskapsomsyn gjer at ulike former for eigen førtidspensjon må tilpassast folketrygda på same måte. Ei eventuell endring skal berre gjelde nye tilfelle.

Regjeringa følgde i 1998 delvis opp fleirtalsmerknaden med eit lovforslag som ville innskjerpe dagens krav til pårekna arbeidsinntekt for enkjer og enkjemenn som har høve til å vere i arbeid. Forslaget blei ikkje vedteke. Stortinget viste til at forslaget ikkje inneheldt noka form for aldersgradering eller tidsavgrensing. Stortinget vedtok at forslaget skulle sendast attende til regjeringa, "slik at saken sendes på høring for drøfting av ulike alternativer før den på nytt legges fram for Stortinget."

Sosial- og helsedepartementet følgjer no opp stortingsvedtaket med det aktuelle høringsnotatet av 22. september 1999.

Høyringsfristen er sett til 31. desember i år. Etter høyringane vil saka bli lagt fram for Stortinget.

Kontaktperson:
Avdelingsdirektør Aase Rokvam, tlf. 22 24 86 24
Rådgivar Lars Bærøe, tlf. 22 24 87 77