Pressemelding

Nr. 44/99
Dato: 07.05.1999

Kombinasjon av pensjon og arbeidsinntekt – endringar i rammelova for avtalefesta pensjon og folketrygdlova

Sosial og helsedepartementet la i dag fram lovforslag om å endra reglane om kombinasjon av pensjon og arbeidsinntekt i ordninga med avtalefesta pensjon (AFP) og i folketrygda.

- Det skal framleis vera høve til tidlegpensjonering gjennom AFP for slitarar og andre som ynskjer å trappa ned før pensjonsalderen, seier sosialminister Magnhild Meltveit Kleppa. Eg meiner likevel det skal svara seg å halda fram i fullt arbeid, framfor å ta ut avtalefesta pensjon før den ordinære pensjonsalderen på 67 år. I dag kan det vera vel gunstig å kombinera arbeid og avtalefesta pensjon. I einskilde høve kan ein til og med få ei høgare disponibel inntekt enn tidlegare dersom ein har delpensjon i AFP.

Etter dei reglane som i dag gjeld for kombinasjon av pensjon og arbeidsinntekt i AFP-ordninga, skal pensjonen bli avkorta med 50 prosent av inntekt over grunnbeløpet i folketrygda. Summen av pensjon og arbeidsinntekt skal ikkje vera høgare enn tidlegare inntekt. Når ein tek omsyn til skattefordelar og AFP-tillegg, kan ein få høgare inntekt ved delpensjonering enn om ein held fram i fullt arbeid. Det er lite heldig og ikkje tilsikta.

Framlegget er basert på utgreiinga frå Førtidspensjonsutvalet, jf NOU 1998:19 Fleksibel pensjonering, og har vore på separat høyring. Alle høyringsinstansane som har uttalt seg er positive til framlegget om eit pro rata-system i AFP-ordninga og at ein bør ha like avkortingsreglar for alle alderspensjonistar mellom 67 og 70 år i folketrygda.

I lova om avtalefesta pensjon gjer departementet framlegg om eit nytt delpensjonssystem for kombinasjon av delpensjon og arbeidsinntekt basert på eit såkalla pro rata-prinsipp. Det inneber at pensjonen blir fastsett i høve til kor mykje arbeidsinntekta blir sett ned. Føremålet med framlegget er å hindra ei høgare disponibel inntekt når yrkesaktiviteten blir redusert enn det pensjonisten hadde som fullt yrkesaktiv.

Departementet gjer òg framlegg om at alderspensjonen frå folketrygda for alle mellom 67 og 70 år skal avkortast etter dei gunstige reglane som blei innførte i 1997. Det vil seia at pensjonen skal avkortast med 40 prosent av arbeidsinntekt som overstig grunnbeløpet. I dag er det to sett med avkortingsreglar, avhengig av om ein har teke ut AFP før fylte 67 år eller ikkje. Alle alderspensjonistar mellom 67 og 70 år i folketrygda vil etter framlegget få like avkortingsreglar.

Departementet føreslår at endringane tek til å gjelda frå det tidspunktet Kongen fastset, og tek sikte på at dette kan skje tidleg i 2000. Endringane i rammelova for AFP får berre verknad for nye pensjonistar frå dette tidspunktet, og såleis ikkje for løpande pensjonar. Endringane i folketrygdlova får òg verknad for løpande pensjonstilfelle.

Kontaktpersonar:
Avdelingsdirektør Aase Rokvam, tlf nr 22 24 86 24
Rådgjevar Tomas Berg, tlf nr 22 24 86 27