Pressemelding

Nr.: 123
Dato: 07.12.1999

Kompensasjon til tidlegare Nordsjø-dykkarar med varig helsesvikt

Regjeringa foreslår å gje ei økonomisk kompensasjon til tidlegare Nordsjø-dykkarar som har fått ein varig helsesvikt og redusert arbeidsevne.

- Vi foreslår at aktuelle dykkarar kan søkje om å få ein eingongsutbetaling på inntil 200 000 kroner. Etterlatne ektefellar eller barn kan og få kompensasjon, dersom det blir dokumentert at avdøde fylte vilkåra for dette. Vi foreslår at ein må ha sett fram krav om kompensasjon innan tre år etter at ordninga trer i kraft. Eg er svært fornøgd med at vi no har klart å finne ei løysing på denne vanskelege saka, seier sosialminister Magnhild Meltveit Kleppa (Sp).

Nærare retningslinjer for ordninga vil om kort tid bli sende på høyring til berørte instansar og organisasjonar. Regjeringa tek sikte på å leggje fram sitt endelege forslag i revidert budsjett, og at ordninga tek til å gjelde frå 1. juli neste år.

Dykkarane i tidlegare faser av petroleumsverksemda i Nordsjøen gjorde eit risikofylt arbeid. Den gongen såg ein ikkje fullt ut såg eventuelle seinverknader av for helsa. Dykking i tidlegare periodar av petroleumsverksemda kan seinare ha ført til varige helseskader hos enkelte dykkarar.

Samstundes ser eksisterande kompensasjonsordningar i liten grad ut til å fange inn situasjonen til tidlegare Nordsjø-dykkarane som har ein helsesvikt. Det gjeld mellom anna retrettordningar som skal gjere det økonomisk mogleg å avslutte karrieren før det oppstår helseskade. Det same gjeld seinare forsikringsordningar som er finansierte av arbeidsgjevaren, til dømes yrkesskadeforsikring.

Vi kan ikkje sjå at staten har opptredd lovstridig eller kritikkverdig i forhold til dei første Nordsjø-dykkarane. Det ligg såleis ikkje føre noko juridisk ansvarsgrunnlag for eit erstatningsansvar.

Regjeringa ser likevel den noko uheldige situasjon som enkelte tidlegare Nordsjødykkarar har hamna i. Vi vil derfor foreslå ei ordning der det gis ein særskilt kompensasjon til desse.

Høvelege skjeringspunkt for ordninga kan til dømes vere å avgrense til personar som har operert som dykkarar i petroleumsverksemda før 1985 då ein fekk petroleumslova, eller i 1990 då lova om yrkesskadeforsikring vart iverksett. Regjeringa gjer framlegg om at ordninga blir avgrensa til personar som har vore dykkarar i ei viss tid før 1990, og at den blir gjort gjeldande for dei som har varige helseskadar og redusert inntektsevne, gjennom eit vilkår om at vedkommande fyller vilkåra for å få uførepensjon frå folketrygda.

- Når det gjeld reglane i folketrygda om yrkesskade, så har alle trygdekontor tidlegare i år fått melding om å henvise personar med mogleg dykkarsjukdom til Haukeland sjukehus for vurdering. Sosial- og helsedepartementet har òg tatt initiativ til at dykkarane kan få tatt opp tidlegare avslagssaker slik at dei får det dei eventuelt har krav på etter folketrygdlova, seier sosialminister Magnhild Meltveit Kleppa.

Kontaktperson:
Avdelingsdirektør Åse Rokvam, 22 24 86 24