Pressemelding

Nr. 110/1999
Dato: 29. oktober 1999

Lovefesting av brukarstyrt personleg assistanse

Regjeringa foreslår å lovfesta ordninga med brukarstyrt personleg assistanse for sterkt funksjonshemma. Ordninga gjeld no for om lag halvparten av kommunane. Lovframlegget vil gjera ordninga til eit tilbod i alle kommunar.

Brukarstyrt personleg assistanse er ei form for pleie- og omsorgsteneste der brukaren sjølv har rolla som arbeidsleiar. I einskilde døme har funksjonshemma opplevd å få opptil 70 ulike personar til å hjelpa seg i løpet av ein månad. Ei lovfesting av ordninga gjer at fleire funksjonshemma kan få ein meir oversiktleg og sjølvstendig kvardag, seier sosialminister Magnhild Meltveit Kleppa.

Brukarstyrt personleg assistanse er ei alternativ organisering av praktisk og personleg hjelp for sterkt funksjonshemma som har behov for bistand i dagleglivet, både i og utanfor heimen. Brukaren har sjølv rolla som arbeidsleiar for sine tenesteytarar og tek større ansvar og styring med innhald og organisering av tenesta. Innanfor dei tidsrammer som kommunen sitt vedtak om praktisk bistand set, kan brukaren styra kven han/ho vil ha som hjelpar(ar), kva assistenten(ane) skal gjera, kvar og til kva tid det trengst hjelp.

Sosialtenestelova § 4-2 bokstav a blir foreslått endra slik at brukarstyrt personleg assistent blir særskild nemnd som ein måte å organisera praktisk bistand på. Med dette blir ordninga ”eit fast tilbod”, slik Stortinget ha ynskt.

Framlegget inneber at kommunane får plikt til å etablera ordninga på same vis som dei andre sosiale tenestene.

Kontaktperson:
Politisk rådgjevar Liv Signe Navarsete 22 24 84 04
Underdirektør Liv Telle 22 24 87 45