Pressemelding

Nr.: 102
Dato: 5.10. 1999

Vertskommunane for tidlegare hvpu-institusjonar får 24 millionar kroner ekstra i 2000

Vertskommunetilskotet utgjer i fleire av kommunane ein stor del av kommunane sine budsjett, det meste til løn av personell som yter tenester direkte til psykisk utviklingshemma.
- Det er eit mål at desse kommunane kan planleggje ei utvikling ut frå vertskommunetilskotet. Det har difor vore eit prioritert tiltak for regjeringa å leggje inn kompensasjon for venta prisutvikling i kommunesektoren for akkurat dette tilskotet, seier sosialminister Magnhild Meltveit Kleppa (Sp).
Tilskotet er sett til 920,8 millionar kroner i 2000. Dette er ein auke på 24 millionar kroner frå i fjor.

Reforma for menneske med psykisk utviklingshemming (frå 1991) var eit av dei største sosialpolitiske løfta for kommunane på mange år. Det fylkeskommunale Helsevernet for psykisk utviklingshemma (HVPU) vart lagt ned. Primæransvaret for psykisk utviklingshemma som budde på eller hadde eit dagtilbod på HVPU-institusjonane, i alt meir enn 7 000 menneske, vart overført til kommunane.

- Det viste seg at mange av dei som opphaveleg kom frå andre kommunar, ynskte å bli buande i institusjonskommunen, sjølv om institusjonen var lagt ned. Fleire av desse kommunane overtok så mange brukarar at tenesteapparatet måtte byggjast opp til ein ganske dominerande del av kommunen sin aktivitet i det heile, fortel sosialministeren.

- Dette førte til at det i 1993 vart innført eit eige vertskommunetilskot til 33 av desse kommunane på Sosial- og helsedepartementet sitt budsjett.

Sosial- og helsedepartementet har elles avtalt å samarbeide nært med vertskommunane sin organisasjon LVSH om opplegget for justeringa av vertskommunetilskotet for åra framover.

Etter initiativ frå Sosial- og helsedepartementet har Noregs forskingsråd (NFR) utarbeidd eit program for forsking om levekår for menneske med psykisk utviklingshemming.

- Tidlegare på 1990-talet hadde NFR ansvar for ei brei evaluering av ansvarsreforma. No er det primært levekåra, korleis dei psykisk utviklingshemma har det ti år etter reforma, vi ynskjer å setje på dagsorden, seier Meltveit Kleppa.

Det gjeld i fylgje Kleppa heile gruppa psykisk utviklingshemma, ikkje berre dei som hadde eit tilbod i regi av HVPU før reforma.

Forskingsprogrammet skal vare frå 1999 til 2002. Det meste av løyvingane kjem frå Sosial- og helsedepartementet, men Kyrkje-, utdannings- og forskingsdepartementet deltek også med midlar.

STATSBUDSJETTET 2000, KAP. 673 POST 61 - FORDELINGA AV VERTSKOMMUNETILSKOTET (beløp i 1 000 kr)

Kontaktperson:
Per Eivind Hem, tlf. 22 24 85 70
Gerd J. Homstvedt, tlf. 22 24 83 83