Som eit ledd i oppfølging av stortingsmeldinga Handlingsplan for funksjonshemma 1998 – 2001, har Sosial- og helsedepartementet løyvd 2.1 millionar kroner til oppstart av to prosjekt i regi av Funksjonshemmedes fellesorganisasjon (FFO) og Norges Handikapforbund (NHF). Prosjekta vert gjennomført i fagleg samarbeid med Justisdepartementet. Prosjekta skal gå over tre år.

- Dette tiltaket er eit uttrykk for Regjeringa sitt ynskje om systematisk kunnskap om kva hindringar funksjonshemma i dag opplever i møte med det offentlege når det gjeld å få oppfylt sine rettar, seier Navarsete.

Det skal etablerast kontor fleire stader i landet der funksjonshemma kan ringe for å få råd og rettleiing i spørsmål knytt til rettar på område som til dømes folketrygd, helse- og sosialtenester, bustad og transporttenester. I tillegg skal ein systematisere på kva område og kvifor funksjonshemma søkjer rettleiing.

- Saman med arbeidet til det offentlege utvalet som er sett ned av Regjeringa for å gjennomgå funksjonshemma sine rettar i ein større samanheng, vil prosjekta som no vert etablert gje viktig grunnlag for å vurdere korleis rettstryggleiken for funksjonshemma kan styrkjast, seier sosialministerens politiske rådgjevar.

Kontoret som vert opna i dag i regi av FFO har tlf: 22 79 90 60.