Sosialminister Magnhild Meltveit Kleppa (Sp) starta tysdag 7. mars opp eit prosjekt for funksjonshemma med særleg dårlege levekår i bydel Sagene Torshov. Prosjektet, som har ei ramme på 7 mill kroner, er finansiert av Sosial- og helsedepartementet. - Dette er eit viktig prosjekt som er ei oppfølging av både Utjamningsmeldinga og Handlingsplan for funksjonshemma, seier sosialminister Kleppa.

Prosjektet har fått namnet Prosjekt grunnstønad og Oslo kommune har teke ansvar for å gjennomføre det over to år.

Undersøkingar frå 1995 og 1998 viser at mellom 10 og 20% av dei som mottek grunnstønad frå Folketrygda kjem ut med mykje dårlegare levekår enn andre med grunnstønad når det gjeld betalingsevne, sosial kontakt og bustad. Statistikk frå Rikstrygdeverket syner at det i 1998 budde vel 1200 grunnstønadsmottakarar i bydel Sagene Torshov. Prosjektet i bydelen vil tilsetje feltarbeidarar som skal oppsøke dei grunnstønadsmottakarane som kjem dårlegast ut. I samarbeid med dei det gjeld vil den enkelte sin livssituasjon bli vurdert i høve til gjeldande ordningar, tiltak og tenester. Informasjon og rettleiing er viktige oppgåver i prosjektet.

Effekten av det oppsøkjande arbeidet skal bli vurdert. - Det er eit sentralt mål å identifisere manglar ved gjeldande tenester og ordningar slik at ein kan utvikle meir treffsikre tiltak for grunnstønadsmottakarar med dårlegast levekår, seier sosialminister Magnhild Meltveit Kleppa (Sp). Departementet har samstundes eit prosjekt i gang der ein hentar inn meir kunnskap om grunnstønadsmottakarane og om tenesteapparatet sitt forhold til dei. Nokre førebels resultat ligg føre.