Sosial- og helsedepartementet har fordelt løyvinga på 237 millionar kroner til utvikling av sosialtenesta og tiltak for rusmiddelmisbrukarar. Midlane kjem i tillegg til 139 millionar kroner løyvde til førebyggjande tiltak over Rusmiddeldirektoratet sitt budsjett.

Løyvingane er til saman auka med 53,7 millionar kroner i høve til statsbudsjettet for l999. Det betyr ei styrking av tilbodet, både når det gjeld tiltak for rusmiddelmisbrukarar, arbeidet i stiftingar og frivillige organisasjonar og tiltak for å betre sosialtenesta sitt arbeid, seier sosialminister Magnhild Meltveit Kleppa (Sp). - Også arbeidet med forsking har fått større løyvingar, og det er sett inn midlar i tiltak for å jamne ut forskjellar i inntekt og levekår.

I Buskerud, Telemark og Vest-Agder blir lågterskelhelsetilbod for rusmiddelmisbrukarar styrkt og ført vidare. Drammen får 600 000, Skien 750 000 og Kristiansand 500 000 kroner.

Fleire kommunar i dei tre fylka får midlar til tiltak for hardt belasta rusmiddelmisbrukarar: Drammen får 2,2 millionar kroner, T5 Dag- og aktivitetssenter i Arendal får 650 000, Kristiansand og Misbrukarteamet 2,1 millionar og Vest-Agder fylkeskommune - A-klinikken får 500 000 kroner. Tønsberg får 850 000 kroner til formålet. Kommunen deltek i Kommunal- og regionaldepartementet sitt forsøk, og får midlane som rammetilskot.

I dei tre fylka blir det også ei brei satsing på førstelinja i sosialtenesta, medrekna tiltak for rusmiddelmisbrukarar. Fleire av prosjekta rettar seg mot samarbeid mellom sosialteneste, arbeidskontor og trygdekontor. Nøtterøy kommune får 400 000 kroner til eit arbeidstreningstiltak for personar med samansette behov. Ål kommune får 100 000 kroner til eit prosjekt om tverretatleg samarbeid, og Tinn kommune får 150 000 til eit tiltak om samarbeid mellom m.a. sosialtenesta og arbeidsmarknadsetaten.

Brukerforeningen i Tønsberg får 75 000 kroner i tilskot til arbeidet sitt for rusmiddelmisbrukarar.

Av andre tiltak som får støtte kan nemnast:

Telemark fylkeskommune/Borgestadklinikken: 500 000 kroner til tiltak for gravide rusmiddelmisbrukarar på tvangsvedtak.

Telemarksforsking: 200 000 kroner til evaluering av tre-fylkessamarbeid om tvangsbehandling av gravide og andre rusmiddelmisbrukarar i institusjon.

Lækjemiddelassistert rehabilitering (metadon og buprenorfin):

Aust-Agder fylkeskommune: 1,7 millionar kroner.

Vest-Agder fylkeskommune: 4,3 millionar til metaondassistert rehabilitering og 1,2 millionar til utprøvingsprosjekt med buprenorfin.

Andre tiltak for rusmiddelmisbrukarar:

Drammen kommune: 350 000 kroner til bustadtiltak for personar med samansette behov, medrekna rusrelatert problematikk.

Skien kommune: 400 000 til bustad/behandlingstilbod for bebuarar med dobbeltdiagnoseproblematikk.

Sandefjord kommune: 250 000 kroner til rehabiliteringstiltak for rusmiddelmisbrukarar.

Tønsberg/Larvik/Sandefjord/Borre kommune og Origosenteret: 100 000 kroner til auka kvalitet ved inntak i institusjon, oppfølging under og etter opphaldet.

Borre og Våle kommune og Borgestadklinikken: 25 000 kroner til organisering og utvikling av tiltak på rusmiddelfeltet.

Larvik kommune: 100 000 til ettervern – miljøtiltak knytt til butilbod for rusmiddelmisbrukarar.

Sande kommune: 150 000 til utvikling av tiltakskjede for ungdom med rus/psykiatri-problematikk

Vest-Agder fylkeskommune: 165 000 kroner til ettervernsprosjekt for kvinnelege rusmiddelmisbrukarar.

Kristenfolkets edruskapsråd (KE): 100 000 til å vidareutvikle Ungdomsprosjektet mot rus, vold og krim i Arendal.

Andre tiltak:

Kragerø kommune 100 000 kroner til forsøk med sosial- og yrkesrehabilitering av utsette grupper.

Porsgrunn kommune: 300 000 til prosjekt om språklege minoritetar og tverrfagleg samarbeid.

Notodden kommune: 250 000 til utvikling av samarbeidsformer.

Kristiansand kommune: 400 000 kroner til bustadprosjekt for bustadlause, medrekna rusmiddelmisbrukarar.