Opptrapping av aktiviteten på rusfeltet (Østlandet)

Sosial- og helsedepartementet har fordelt løyvinga på 237 millionar kroner til utvikling av sosialtenesta og tiltak for rusmiddelmisbrukarar. Midlane kjem i tillegg til 139 millionar kroner løyvde til førebyggjande tiltak over Rusmiddeldirektoratet sitt budsjett.

- Løyvingane er til saman auka med 53,7 millionar kroner i høve til statsbudsjettet for l999. Det betyr ei styrking av tilbodet, både når det gjeld tiltak for rusmiddelmisbrukarar, arbeidet i stiftingar og frivillige organisasjonar, og tiltak for å betre sosialtenesta sitt arbeid, seier sosialminister Magnhild Meltveit Kleppa (Sp). - Også arbeidet med forsking har fått større løyvingar, og det er sett inn midlar i tiltak for å jamne ut forskjellar i inntekt og levekår.

I helseregion Aust (Oslo, Akershus, Østfold, Hedmark og Oppland) er det sett i verk ei rekkje nye tiltak.

I Oslo blir det no etablert eit toårig forsøksprosjekt med brukarkontor i bydel 5 Grünerløkka-Sofienberg. Kontoret skal vere ein stad der personar kan vende seg når dei anten ikkje finn fram i hjelpeapparatet, eller meiner at dei ikkje har fått den hjelpa dei treng eller har krav på. Oslo kommune får ein million kroner til dette formålet. Fattighuset i Oslo får 150 000 kroner til eit nytt prosjekt om brukarmedverknad. Samla får Oslo kommune nær 60 mill kroner til ulike tiltak innan rusomsorga.

Det er eit stort behov for å styrkje og føre vidare lågterskelhelsetilbodet til rusmiddelmisbrukarar. Midlane til slike tiltak i helseregion Aust aukar derfor frå 2 millionar i 1999 til 3,5 millionar i år. Asker, Bærum og Oslo kan no føre vidare og styrkje lågterskeltilboda sine til rusmiddelmisbrukarar.

Sosialministeren har teke til orde for ei styrking av ettervernet for rusmiddelmisbrukarar som har avslutta behandling. Som ledd i denne styrkinga får Nord-Aurdal 390 000, Solliakollektivet 700 000 og Klientaksjonen i Fredrikstad 130 000 kroner til ettervernstiltak. Dette er nye midlar. I tillegg blir desse ettervernstiltaka, som alt er i gang, førte vidare: Blå Kors Senter for rusrelaterte problem i Oslo, Ettervernsprosjektet i Moss, Ettervernstilbodet Tyrilihagen (Tyrilistiftelsen) og butreningstiltaket i Lillehammer.

Fredrikstad kommune får 300 000 kroner til nytt tiltak for vanskelegstilte bustadlause og rusmiddelmisbrukarar, og 300 000 til eit tiltak for aktivisering av langtids-sosialhjelpsmottakarar. Det tiltaket er òg nytt. Fredrikstad er ein av kommunane som får midlar til forsøk som ei oppfølging av St.meld.nr. 50 (1998-99) Utjamningsmeldinga. I meldinga seier regjeringa at ho vil styrkje innsatsen overfor bustadlause og setje i gang forsøk der nokre kommunar får eit heilskapleg ansvar for å sikre aktive, arbeidsretta tiltak for mottakarar av sosial stønad, med sikte på at dei kjem i arbeid.

Oversikt over tilskot til utvikling av sosialtenesta og tiltak for rusmiddelmisbrukarar i helseregion Aust:

Diverse enkelttiltak

• Oslo kommune, brukarkontor. 1 million kroner.

• Oslo kommune, tilskot pro-senteret. 3,8 millionar.
• Fattighuset, prosjekt Brukermedvirkning i samfunnsdebatten. 150 000 kroner.

• Oslo kommune, Blå Kors Senter for rusrelaterte livsproblemer. Poliklinisk behandling av spilleavhengige. 300.000.

Utjamningsmeldinga

• Oslo kommune. Bustadoppfølging av vanskelegstilte kommunale leigetakarar, medrekna rusproblematikk.

300 000

• Fredrikstad kommune. Utvikling av tiltak overfor vanskelegstilte bustadlause og rusmiddelmisbrukarar. 300 000 kroner.

• Oppegård kommune. Rehabilitering og kvalifisering av langtidsmottakarar av sosialhjelp. 200 000.

• Fredrikstad kommune. Aktivisering av langtids-sosialhjelpsmottakarar. 300 000.

Handlingsplanen Kunnskap og brubygging

• Fredrikstad kommune. Prosjekt Evaluering av sosialhjelpssatsane i kommunen. 200 000.

• Østfold fylkeskommune. Tiltaksutvikling for yngre rusmiddelmisbrukarar. Prosjektmidlar overførte frå 1999.
• Lunner kommune. RUSAM-prosjektet. Fremje samarbeid mellom etatane, generell kompetanseutvikling og kompetanseheving knytt til rusproblematikk. 75 000.

• Oslo kommune. Utviklingssenter for sosialtenesta i Oslo, medrekna rusproblematikk. 400 000.

• Ringsaker kommune. Dobbelt trøbbel – psykiske lidingar og rusmisbruk. Dobbeltdiagnoseproblematikk – prøveprosjekt.100 000 kroner.

• Tiltaksutvikling for yngre rusmiddelmisbrukarar. Prosjektmidlar overførte frå 1999.

Lækjemiddelassistert rehabilitering

• Oslo kommune. Metadonassistert rehabilitering i helseregion Aust. 33,5 millionar kroner.

• Oslo kommune. Utprøvingsprosjekt med buprenorfin. 2,4 millionar.

Strakstiltak

• Oslo kommune. Tiltak for hardt belasta rusmiddelmisbrukarar. 13 millionar.

Ettervern

• Nord-Aurdal kommune. Bu- og aktivitetstilbod til tyngre rusmiddelmisbrukarar. 390 000 kroner.

• Akershus fylkeskommune. Solliakollektivet. 700 000.

• Tyrilistiftelsen. Ettervernstilbodet ved Tyrilihaugen. 1 million.
• Blå Kors Senter for rusrelaterte problem. Nettverksbasert oppfølging av rusmiddelmisbrukarar. 200 000.

• Moss kommune. 500 000.

• Østfold fylkeskommune. Klientaksjonen i Fredrikstad. Lågterskeltilbod for rusmiddelmisbrukarar. 130 000.

• Lillehammer kommune. Butrening for tunge rusmiddelmisbrukarar.

Midlar overførte frå 1999.

Lågterskel helsetiltak

• Oslo kommune. 2,5 millionar kroner.
• Asker kommune. 350 000 (+ overføring av midlar frå 1999).
• Bærum kommune. 600.000

Andre rusmiddeltiltak

• Fengselsprosjekt. Motivasjon og ansvar og Stifinner’n. 2,8 millionar kroner.