Pressemelding

Nr.: 10/2000
Dato: 21. januar 2000

Staten vann sak om draktreklame i Høgsterett

Høgsterett avsa i dag 21.1.00 dom i saka mellom Aass Bryggeri, Hansa Borg Bryggerier og Bryggeriforeningen og staten, ved Sosial - og helsedepartementet.

Saka gjaldt bruk av bryggerilogoer på idrettsdrakter.

- Vi er glade for denne domen, i ei prinsippsak om reklameforbodet i alkohollova. Reklameforbodet er eit viktig verkemiddel i alkoholpolitikken, og denne domen slår fast at forbodet skal vera effektivt mot forsøk på omgåingar gjennom bruk av logoer som også er varemerke for øl, seier sosialminister Magnhild Meltveit Kleppa (Sp).

Staten har dermed fått medhald i si tolking av reklameforbodet i alkohollova, slik det har vore sidan midten av 70-talet.

- I ei tid der haldningane til alkohol er meir liberale, der tilgangen har blitt større, og avgiftsnivået er under diskusjon, er det svært viktig å oppretthalda andre førebyggjande tiltak. I denne samanhengen er reklameforbodet sentralt. Ungdom og vaksne blir møtte med mange nok oppfordringar til alkoholbruk, om det ikkje skal skje også på draktane på idrettsbanen, seier sosialministeren.

Kontaktperson:
Avdelingsdirektør Inger Gran 22248525
Rådgjevar Stig Halvor Langmoen 22248526