Pressemelding

Nr. 66/98
Dato: 3. mars 1998

Ny leiar for Internasjonal avdeling ved Statsministerens kontor

Spesialrådgjevar Øyvind Nordsletten (53), Oslo, er i statsråd i dag konstituert som ekspedisjonssjef ved Statsministerens kontor fram til 28. februar 1999, for å leie den internasjonale avdelinga ved kontoret. Nordsletten har fungert i stillinga sidan 1. mars i år, då ekspedisjonssjef Jonas Gahr Støre fekk eit års permisjon for å arbeide for den påtroppande generaldirektøren i Verdshelseorganisasjonen, Gro Harlem Brundtland.

Øyvind Nordsletten, som opphaveleg kjem frå Jæren, var norsk ambassadør i Ukraina og Kviterussland frå 1992 til 1996. Han har vore tilsett i den norske utanrikstenesta sidan 1974, og har tenestegjort ved ambassaden i Ankara (1977-1979), ved ambassaden i Moskva (1979-1982), og i Utanriksdepartementet (1974-1976, 1982-1992 og 1996-1997). I august 1997 vart han tilsett som spesialrådgjevar i den internasjonale avdelinga ved Statsministerens kontor.

Øyvind Nordsletten har Forsvaret sitt russisk-kurs, og har eksamenar i russisk og engelsk ved Universitetet i Oslo. Han har og arbeidd som lærar, som konsulent i Forsvarets Overkommando og som vaktassistent ved den norske ambassaden i Moskva.