Pressemelding

Nr. 90/1999
Dato: 4. juni 1999

Priv til red.:

Statsministerens program

Tysdag 8. juni kl. 09.45 opnar statsministeren Barne- og familiedepartementet sin konferanse i høve 20-årsjubiléet for likestillingslova, i Gamle Logen på Grev Wedels plass 2 i Oslo.

Onsdag 9. juni er statsministeren i Stavanger, i samband med ENS-konferansen (Environment Northern Seas) i Stavanger Forum. Kl. 14.30 gjestar han gass-senteret på konferansen, kl. 15.00 kjem han til ”Barnas ENS”, og kl. 16.15 talar han på eit spesialmøte om ”Regjeringens miljøsatsing inn i neste årtusen”.

Torsdag 10. juni kl. 17.45 er statsministeren til stades under utdelinga av Anders Jahres kulturpris, i Universitetsaulaen i Oslo.

Frå laurdag føremiddag 12. juni til måndag kveld 14. juni er statsministeren i Makedonia, Albania, Bosnia, på Grazzanise-basen i Italia og i NATO-hovukvarteret i Brussel, for å få førstehandsinntrykk av situasjonen på Balkan og presentere norske synspunkt. Statsministeren vil mellom anna gjeste kosovoalbanske flyktningar, møte representantar for styresmakter og hjelpeorganisasjonar, gjeste NATO-styrkar og møte NATO sin generalsekretær.

Reisa vil gå føre seg med norsk militært transportfly, der det også vil vere plass til pressefolk. Prisen pr. person tur/retur vil vere kr. 6.000. Utgifter til lokal helikoptertransport kan kome i tillegg. Pressefolk som ynskjer plass i statsministeren sitt fly, og på hotell i Skopje (12.-13. juni) og Sarajevo (13.-14. juni), må innan tysdag 8. juni melde frå til Utanriksdepartementet sitt pressekontor, telefon 22 24 31 41/49 – telefaks 22 24 27 87. Vi gjør merksam på at hotellkapasiteten i Skopje kan gjere det naudsynt med improvisasjonar.

Programmet for reisa ser førebels slik ut:

Laurdag 12. juni: Avreise frå Gardermoen flystasjon om morgonen, til Skopje i Makedonia. Lunsj ved det norske militære støtteelementet. Om ettermiddagen samtalar med makedonske leiarar, gjesting i flyktningeleir, gjesting på det norske Raudekross-feltsjukehuset og Kirkens Nødhjelp sitt undervisningsprosjekt, møte med representantar for UNHCR og OSSE. Overnatting på Hotel Aleksandar Palace i Skopje.

Sundag 13. juni: Avreise frå Skopje om morgonen, til Tirana i Albania. Frokost med representantar for UNHCR, OSSE og NATO, møte med albanske leiarar, gjesting i flyktningeleir. Om ettermiddagen avreise til Sarajevo i Bosnia. Møte med SFOR-leiinga og Telemark-kompaniet, besøk til Norsk Folkehjelp sitt mineryddingsprosjekt. Overnatting på Grand Hotel i Sarajevo.

Måndag 14. juni: Avreise frå Sarajevo til Modrica om morgonen. Frokost i den norske bataljonen. Om føremiddagen retur til Sarajevo, for avreise til Grazzanise-basen i Italia. Gjesting ved den norske jagarflystyrken. Om ettermiddagen avreise til Brussel, for samtale med generalsekretær Javier Solana i NATO-hovudkvarteret. Om kvelden avreise frå Brussel til Gardermoen flystasjon.