Pressemelding

Nr. 12/98
30.01.98

Frihandelsavtale mellom EFTA-landa og Marokko

Regjeringa godkjende i statsråd i dag stortingsproposisjonen om samtykke til ratifikasjon av ein frihandelsavtale mellom EFTA-landa og Marokko. Frihandelsavtalen vart underteikna under ministermøtet i EFTA den 19. juni 1997 i Genève.

Frihandelsavtalen mellom EFTA-landa og Marokko er bygd over same lesten som frihandelsavtalane mellom EFTA og dei baltiske statane. Avtalen omfattar med få unntak handel med industrivarer, foredla landbruksvarer, fisk og fiskeprodukt. Avtalen er forhandla fram i samsvar med artikkel XXIV i GATT. Som ein del av avtalekomplekset, underteikna Noreg samstundes ein bilateral landbruksprotokoll om handel med uforedla landbruksvarer med Marokko.

Frå norsk side vil det bli opna for full frihandel når avtalen trer i kraft. Marokko vil få overgangsperiodar på opp til 12 år for å sluttføre tollavviklinga, med unntak av ferskvassfisk, der det ikkje er fastsett noka endeleg tollavvikling. Ettersom Marokko har kunna nyte godt av den norske tollpreferanseordninga overfor utviklingsland (GSP), er det berre for einskilde produkt at frihandelsavtalen vil medføre tilleggskonsesjonar frå norsk side.

Hovudmålsetjinga med frihandelsavtalen er å sikre parallellitet med EU for å oppnå same handelsvilkår som i assosieringsavtalen mellom EU og Marokko. På same tid ønskjer EFTA-landa å støtte opp om det breiare samarbeidet mellom EU og middelhavslanda med det formål å sikre politisk stabilitet og økonomisk utvikling i regionen, den såkalla Barcelona-prosessen. Frihandelsavtalen vil vere eit viktig bidrag i så måte.