Pressemelding

Nr. 108/98
Dato 11. september 1998

To millionar til hjelpearbeid i Nordvest-Russland.

Utanriksdepartementet vil i første omgang stilla to millionar kroner til rådvelde for hjelp til dei kriseramma i Nordvest-Russland. Hjelpa som består av ulike typar nødvendige matvarer, vil i hovedsak bli gitt gjennom norske frivillige organisasjonar og først og fremst Norges Raude Kross.

Bakgrunnen for hjelpa er den appellen den russiske guvernøren i Murmansk, Jurij Jevdokimov, har kome med til fylkesordførarane i Finnmark og Troms om humanitær hjelp til spesielle grupper og område som er særleg ramma. Situasjonen er særleg vanskeleg i institusjonar for born og sjuke og eldre.

I tillegg til den tosidige hjelpa har Norge som formann i Barentsrådet teke kontakt med dei andre nordiske land for å sikra ei best mogeleg samordning av hjelpesendingane. Vidare skal Regionrådet innanfor Barentssamarbeidet ( som er samansett av representantar for dei nordlege fylkene i deltakarlanda) møtast i Luleå tysdag for å drøfta korleis regionale samarbeidsorgan kan nyttast som svar på henvendinga frå guvernøren i Murmansk.

Etter norske styresmakters vurdering er den generelle situasjonen i Murmansk i dag alvorleg, men ikkje kritisk. Ein kan likevel ikkje utelukka at situasjonen kan forverra seg i tida framover og at det kan bli behov for ytterlegare hjelp.