Regjeringa vedtek sanksjonar mot Taliban-regimet i Afghanistan
Historisk arkiv
Publisert under: Regjeringen Bondevik I
Utgiver: Utenriksdepartementet
Pressemelding | Dato: 22.12.1999 | Sist oppdatert: 21.10.2006
Pressemelding
Nr. 215/99
Dato: 22. desember 1999
Regjeringa vedtek sanksjonar mot Taliban-regimet i Afghanistan
Regjeringa har i dag vedteke føresegn om gjennomføring av resolusjon 1267 frå Tryggingsrådet i FN om sanksjonar mot Taliban.
Tryggingsrådet vedtok den 15. oktober 1999 samrøystes å innføra avgrensa sanksjonar mot den afghanske fraksjonen Taliban, som også kallar seg Det Islamske Emiratet i Afghanistan. Resolusjonen inneheld eit forbod mot å tillate luftfartøy som blir nytta av eller på vegne av Taliban, å take av eller lande på norsk territorium. Vidare inneheld resolusjonen eit påbod om å fryse finansielle midlar i Noreg som tilhøyrer Taliban og eit forbod mot å gjere midlar tilgjengelege for Taliban.
Bakgrunnen for sanksjonane er Talibans manglande utlevering av terroristleiaren Usama bin Laden. Bin Laden driv eit nettverk av treningsleirar for terroristar frå Taliban-kontrollerte område og brukar Afghanistan som base for å støtte internasjonale terroristhandlingar. Usama bin Laden er mellom anna tiltala for bombeattentata mot dei amerikanske ambassadane i Nairobi, Kenya og Dar es Salaam, Tanzania den 7. august 1998. USA har bede Taliban om å utlevere han til USA for å stillast for retten der.
Sanksjonane er utelukkande knytte til Talibans manglande utlevering av Usama bin Laden. Sanksjonane vil bli heva så snart han blir utlevert.
Utanriksdepartementet er gjeve fullmakt til å endre, suspendere eller oppheve føresegna.
Føresegna tek til å gjelde straks.
Lagt inn 22. desember 1999 av Statens forvaltningsteneste, ODIN-redaksjonen