Pressemelding

Nr. 15/99
Dato: 28. januar 1999

Utanriksminister Vollebæk deltar på kontaktgruppemøte i London

Utanriksminister Knut Vollebæk deltar fredag 29.1. på utanriksministermøte i London i Kontaktgruppa for det tidlegare Jugoslavia. Kontaktgruppa er samansett av USA, Storbritannia, Russland, Frankrike, Tyskland og Italia. Utanriksminister Vollebæk deltar som formann i Organisasjonen for tryggleik og samarbeid i Europa (OSSE).

Tema for møtet er situasjonen i Kosovo. Kontaktgruppa skal på bakgrunn av den aukande spenninga i området og partane sin manglande vilje til å etterleva gjeldande avtalar, drøfta korleis den internasjonale innsatsen kan samordnast og vidareførast for å få til ei politisk løysing.

Utanriksminister Vollebæk seier at partane no må innsjå alvoret i situasjonen og oppmodar dei på det sterkaste til å setja seg til forhandlingsbordet. – Ei forhandlingsløysing er den einaste farbare veg, seier utanriksministeren. – OSSE vil arbeida aktivt saman med NATO, Kontaktgruppa og resten av det internasjonale samfunn for å finna ei løysing på konflikten i Kosovo, seier utanriksminister Knut Vollebæk.

Utanriksdepartementet, 28. januar 1999