Pressemelding

Nr. 141/99
Dato: 20. august, 1999

Utanriksminister Vollebæk til Tyrkia og Midt-Austen 21.-26.8.99

Utanriksminister Knut Vollebæk reiser laurdag 21.8. på ei omfattande rundreise til Midt-Austen som omfattar Tyrkia, Israel, Dei palestinske områda, Jordan, Syria og Egypt. Besøket blir innleia i Jerusalem søndag 22. august med samtalar med utanriksminister David Levy og statsminister Ehud Barak.

Søndag ettermiddag drar utanriksministeren til Tyrkia på offisielt besøk etter invitasjon frå den tyrkiske utanriksminister. Besøket blir innleia i Istanbul med samtalar med utanriksminister Ismail Cem. Deretter dreg utanriksministeren til Izmit der han skal besøkja dei verst ramma jordskjelvområda. Besøket i Tyrkia blir avslutta med samtalar i Ankara måndag 23. august der Vollebæk skal møta bl. a. president Demirel og statsminister Ecevit.

Samtalane i Tyrkia vil sjølvsagt vera prega av jordskjelvkatastrofen og korleis ein best kan hjelpa landet. Elles vil førebuingane av OSSE-toppmøtet i Istanbul i november, forholdet til EU, tryggingspolitiske spørsmål og Kypros stå sentralt.

Tysdag 24.8. skal utanriksminister Vollebæk ha samtalar i Amman, Jordan med statsminister Rawabdeh og utanriksminister Al-Khatib og ettermiddagen same dag i Damaskus, Syria med den syriske utanriksminister Al-Shara’a.

Onsdag 25.8. skal utanriksministeren møta president Arafat truleg i Gaza. Dessutan skal han bl.a. møta Shimon Peres.

Besøket blir avslutta onsdag kveld med samtalar i Kairo med den egyptiske utanriksminister Amr Moussa.

Hovedtema for samtalane i Midt-Austen er situasjonen i fredsprosessen etter valet i Israel, gjevarlandsarbeidet til Dei palestinske områda der Norge er formann i den internasjonale gjevarlandsgruppa AHLC og situasjonen i regionen generelt.