Utanriksminister Vollebæk uroleg over arrestasjonar i Kviterussland
Historisk arkiv
Publisert under: Regjeringen Bondevik I
Utgiver: Utenriksdepartementet
Pressemelding | Dato: 03.03.1999 | Sist oppdatert: 21.10.2006
Pressemelding
Nr. 32/1999
Dato: 3. mars 1999
Utanriksminister Vollebæk uroleg over arrestasjonar i Kviterussland
Utanriksminister og OSSE-formann Knut Vollebæk gir uttrykk for sterk uro over dei nylege arrestasjonane og dommane mot formannen og andre medlemmer av den opposisjonelle valkomiteen som arbeider for presidentval i Kviterussland i mai 1999. Bakgrunnen for arrestasjonane er ein grunnlovsstrid mellom regjeringa og opposisjonen i landet som omhandlar bl.a. når det skal haldast presidentval i landet.
- Det er avgjerande at den alvorlege grunnlovsstriden som no har oppstått blir løyst utan konfrontasjon og bruk av udemokratiske verkemiddel, seier OSSE-formann Knut Vollebæk.
- OSSE vil halda fram arbeidet for å få istand ein politisk dialog mellom partane og finna ei løysing i grunnlovsstriden.
Utanriksministeren minner regjeringa i Kviterussland om dei plikter den har som medlem i OSSE til å respektera demokratiske prinsipp, og appellerer både til regjeringa og opposisjonen om å medverka til å finna ei politisk løysing på konflikten.
Utanriksdepartementet, 3. mars 1999
Lagt inn 4. mars 1999 av Statens forvaltningstjeneste, ODIN-redaksjonen