Noreg ratifiserer den valfrie protokollen til FNs kvinnekonvensjon
Historisk arkiv
Publisert under: Regjeringen Bondevik II
Utgiver: Barne- og familiedepartementet
Pressemelding | Dato: 05.03.2002 | Sist oppdatert: 23.10.2006
Barne- og familieminister Laila Dåvøy presenterer for FNs kvinnekommisjon i New York måndag ettermiddag nyheita om at Noreg ratifiserer den valfrie protokollen til FNs kvinnekonvensjon mot diskriminering av kvinner. (04.03.02)
Pressemelding
Nr.: 02011
Dato: 04.0302
Styrkjer kvinners rettar:
Noreg ratifiserer den valfrie protokollen til FNs kvinnekonvensjon
Barne- og familieminister Laila Dåvøy presenterer for FNs kvinnekommisjon i New York måndag ettermiddag nyheita om at Noreg ratifiserer den valfrie protokollen til FNs kvinnekonvensjon mot diskriminering av kvinner.
Statsråden held innlegget sitt kl. 17.00 norsk tid i FNs kvinnekommisjon i New York i dag. I innlegget tek statsråden også opp æresdrap, tvangsekteskap og omskjering av kvinner. Barne- og familieministeren peikar spesielt på at det er viktig å inkludere minoritetskvinner i arbeidet for likestilling og menneskerettar.
- Den valfrie protokollen til kvinnekonvensjonen utgjer ein ny sjanse til å styrkje kvinners rettar. I innlegget mitt vil eg oppmode land som ikkje har ratifisert denne protokollen til å følgje etter, seier barne- og familieminister Laila Dåvøy.
Den valfrie protokollen til FNs kvinnekonvensjon skal medverke til at statar i større grad gjer det dei pliktar etter kvinnekonvensjonen. Protokollen vil styrkje kvinners rettar og fremme reell likestilling mellom kjønna. Når den valfrie protokollen trer i kraft for Noreg om tre månader, blir det høve for kvinner i Noreg til å klage til FNs kvinnekomité dersom dei meiner at Noreg krenkjer rettane deira etter FNs kvinnekonvensjon. Kvinnekomitéen kan på eige initiativ undersøkje om det foregår alvorlege eller systematiske brot på kvinnekonvensjonen i Noreg.