Reviderte reglar om EUs miljømerke (EU-blomen)

Regjeringa har i dag lagt fram for Stortinget forslag til endringar i merkelova, slik at EUs reviderte forordning om miljømerking blir gjennomført i norsk rett. Forordninga er også innlemma i EØS-avtalen. EU-forordninga eksisterer side om side med andre europeiske merkeordningar som til dømes det nordiske svanemerket og nasjonale merke som den tyske "blå engel".

Dei viktigaste endringane i forhold til den tidlegare forordninga er:

-høve til å utarbeide kriteria også for tenester
-meir detaljerte retningslinjer for miljøkrav, kriteria og krav til verifisering
-utfyllande informasjon på merket om dei viktigaste kriteria for produktgruppa
-strengare krav til at statane skal fremme bruken av merket gjennom informasjon og marknadsføring retta både mot næringsliv og forbrukarar.

EU-blomen er førebels lite brukt i Noreg, men norske produsenter kan søkje om å bruke EUs miljømerke. Det er stiftinga Miljømerking, som er det utøvande organet for det nordiske miljømerket "Svana" i Noreg, som er norsk ansvarleg organ for miljømerkesystemet til EU. Stiftinga har fullmakt til å vurdere og godkjenne søknader om å bruke EUs miljømerke. Stiftinga tek også aktivt del i EUs utvikling av dei krav som ulike produktgrupper må oppfylle for å bli tildelt merket.

EU har hatt ei ordning med miljømerking sidan 1992. Ordninga blei revidert i 2000 gjennom ei forordning som blant anna føreset meir systematisk og forpliktande samarbeid og samordning mellom EU-merket og andre europeiske miljømerke.

Føremålet med EUs miljømerkeordning er at forbrukarane skal bli i stand til å gjere gode miljøval. Det skal stimulerast til mest mogleg miljøvennleg produktutvikling i landa.

Odelstingsproposisjonen finst på www.bfd.dep.no.