Fiskeridepartementet har fastsett regulering av seifisket sør for 62. graden for 2002. Etter avsetting til tredjeland kan norske fiskarar fange 66.000 tonn sei. Dette er 25.000 tonn meir enn i 2001.

- Seibestanden i Nordsjøen er i positiv utvikling, og dette gjer at det er grunnlag for å auke den norske kvoten, seier fiskeriminister Svein Ludvigsen.

Gruppekvoten for notfartøy er 5.500 tonn og for konvensjonelle fartøy 8.000 tonn. Resten av den norske seikvoten blir tildelt trålarane. Det er sett av 5.000 tonn til industritrålgruppa for å dekke bifangst av sei i industritrålfisket etter augepål og tobis. Med dette får industritrålarane samla ein kvote på 8.800 tonn. Resten av trålkvantumet vert fordelt med 34.675 tonn til torsketrålarane og 9.025 tonn til seitrålarane.

Dei konvensjonelle fartøya vert regulerte med maksimalkvotar på 450 tonn. Det konvensjonelle fisket for fartøy over 28 meter vert stogga når det står att 1.400 tonn av gruppekvoten.

Det direkte trålfisket vert stogga frå og med 1. juli til og med 11. august. 65 prosent av gruppekvoten kan fiskast før sommarstoggen og 35 prosent etterpå.

Trålarane vert regulerte med maksimalkvotar. Fabrikktrålarane kan fiske 700 tonn, medan ferskfisk- og småtrålarane kan fiske 500 tonn. Industritrålarane vert regulerte med maksimalkvotar på 300 tonn. Av dette er 30 tonn garantert kvote. Seitrålarane blir regulerte med differensierte fartøykvotar på 485 tonn til dei miste og 647 tonn til dei største seitrålarane.