Fiskeri- og kystdepartementet har sendt ut forslag til ny lov om akvakultur på allmenn høyring. Den nye lova skal erstatte oppdrettslova og havbeitelova. Dermed vil akvakulturverksemda i framtida bli regulert av éi ny akvakulturlov.

- Formålet med den nye lova er å fremme lønnsemd, vekst og konkurransekraft i akvakulturnæringa innanfor rammene av ein miljøtilpassa produksjon, og å bidra til næringsutvikling på kysten. Havbruksnæringa er viktig for verdiskaping på kysten, og lønsemd er grunnlaget for utviklinga av næringa, seier fiskeri- og kystminister Svein Ludvigsen.

Ludvigsen viser til at forslaget inneber at fokuset blir endra frå kven som eig til korleis verksemda blir driven.

Distriktspolitiske omsyn blir framleis ivaretatt gjennom regionsvise tildelingar av løyver til laks og aure der enkelte regionar kan prioriterast. Regulering av eigarskap i oppdrett av laks og aure blir ikkje fokusert. For å gi eit betre forretningsmessig handlerom til å søke ein optimal struktur blir fokus flytta til korleis verksemda bør drivast for å skape verdiar. Regulering av talet på løyver som kan vere på éin aktør si hand nasjonalt og regionalt blir vidareført. Det blir óg foreslått å innføre adgang til overføring og pant av alle typar løyve til akvakultur. Dette vil samla medverke til å normalisere akvakulturnæringa i høve til anna næringsverksemd. Forslaget vil gjere det lettare for næringa å få eigen- og framandkapital og å møte framtidige utfordringar.

Eit godt miljø er både ein føresetnad for næringa si evne til å drive lønnsamt og å produsere produkt av god kvalitet. Forslaget fører vidare dagens tiltak og omsyn på miljøområdet.

Forslaget til ny lov inneheld vidare fleire forenklande tiltak for næring og forvaltning. Adgang til overføring og pant av løyve gjer det lettare for næringa å gjennomføre forretningsmessige disposisjonar. I tillegg til dette blir det foreslått å innføre ei meir effektiv og rask handsaming av søknader til akvakultur for alle ansvarlege styresmakter. Dette skal korte ned den lange saksbehandlingstida på desse sakene.

Høyringsfristen er 24. januar 2005. Merknader og forslag kan også sendast til Fiskeri- og kystdepartementet si idépostkasse.

•  Høring - ny lov om akvakultur (akvakulturloven)