Større seikvote i 2005

Fiskeri- og kystdepartementet har fastsett totalkvoten for fisket etter sei nord for 62. breiddegrad til 215.000 tonn for neste år. Seikvoten neste år blir dermed auka med 46.000 tonn i forhold til i år.

- Det er gledeleg at seibestanden er i så god forfatning at det er grunnlag for å auke seikvoten for neste år, seier fiskeri- og kystminister Svein Ludvigsen.

Seibestanden nord for 62. breiddegrad er hausta berekraftig og bestanden har god reproduksjonsevne. Den fastsette kvoten for neste år er i samsvar med råda havforskarane har gitt for kvotenivået i 2005.

- Fiskeridirektoratet har utarbeidd ein forvaltningsstrategi for bestanden som vil bli sendt på høyring i 2005. Eg tek sikte på at denne strategien skal leggast til grunn for kvotefastsettinga for 2006. Sidan forvaltningsstrategien enno ikkje er innført er seikvoten for 2005 fastsett i samsvar med råda frå Det internasjonale rådet for havforsking, seier Svein Ludvigsen.