Regjeringa sender no på høring eit forslag om å forby terapeutisk kloning som metode for å skaffe stamceller til medisinsk forsking. Det er òg forslag om å føre vidare dagens forbod mot forsking på befrukta egg. Samtidig satsar Regjeringa 1.5 millioner kroner alt i år på forsking på stamceller henta frå fødde personar.

Nyare forsking har vist at humane stamceller kan ha eit stort potensial til bruk i medisinsk forsking og behandling. Men slik forsking reiser fleire vanskelege etiske problemstillingar på grunn av måten slike stamceller blir framskaffa på. Stamceller kan blant anna hentast frå befrukta egg og frå embryoar som er framstilt ved såkalla terapeutisk kloning.

- Det er etisk uakseptabelt å ta i bruk terapeutisk kloning for å framstille stamceller. Ved terapeutisk kloning blir eit potensielt menneskeliv produsert berre for å fungere som eit middel til bruk for medisinsk forsking. Regjeringa vil også oppretthalde forbodet mot forsking på befrukta egg, jamfør lov av 5. august 1994 nr. 56 om medisinsk bruk av bioteknologi § 3-1. Samtidig vil vi presisere at dette forbodet også skal gjelde stamcellelinjer som er etablert ut frå befrukta egg, og som i dag kan importerast frå utlandet, seier helseminister Dagfinn Høybråten.

Regjeringa meiner det er viktig å satse på forsking som kan gi nye høve for medisinsk behandling av alvorleg sjuke personar. Forsking på bruk av stamceller henta frå fødde personer reiser ikkje dei same etiske motførestellingane som forsking på stamceller frå befrukta egg eller embryoer framstilt ved kloning. Regjeringa vil derfor starte satsing på denne typen forsking og set av 1.5 millionar kroner til slik forsking i år.

.

Kontaktperson: Marianne Sælen, 22 24 82 29