Pressemelding

Nr.: 29-2002
Dato: 5.3.2002
Kontaktperson: Utvalgsleder Ole Gjems-Onstad, tlf. 67 55 71 33 eller utvalgssekretær Tore Fjørtoft, tlf. 22 24 53 88

Utval vil ha lov om samvirkeforetak

- Ei lov om samvirkeforetak er heilt nødvendig for at fleire skal ta samvirkeforma i bruk, seier leiar for Samvirkelovutvalet, professor Ole Gjems-Onstad. I dag blir berre 4 promille av alle nye foretak organisert som samvirkeforetak. Utvalet overleverer i dag si utgreiing til justisminister Odd Einar Dørum.

Formålet med lovforslaget er å styrke samvirkeforma og gjere den til eit klarare alternativ for nye verksemder. Det er femte gong på 100 år at det blir føreslått ei lov om samvirkeforetak. Alle tidlegare lovforslag har blitt lagt i skuffen. No håper eit einstemmig utval at forslaget skal ende med ei lov.

- Det er behov for ei organisasjonsform som fremjar aktiv deltaking frå medlemmene si side, og som kan vere eit reelt alternativ til selskap med reine profittformål, påpeikar Gjems-Onstad. - På ei rekke område er det oppgåver som truleg kan løysast betre gjennom samvirke enn gjennom profittorientert verksemd. Lovregulering kan styrke samvirkeforma og gjere den meir kjent.

Ved utforminga av lovforslaget har utvalet lagt stor vekt på å ivareta særpreget ved samvirkeforma. Samtidig har det vore ei sentral målsetning å gi samvirkeforetaka størst mogleg grad av handlefridom og fleksibilitet.

Lovforslaget inneheld mellom anna reglar om stifting av samvirkeforetak, medlemmene sine rettar og plikter, økonomiforhold, og organisering og leiing av samvirkeforetak. Det er også føreslått reglar om fusjon, fisjon, omdanning og oppløysing. Utvalet meiner at ei samvirkelov vil medføre ei klargjering av dei rettsreglane som gjeld for samvirkeforetak. Dette er både foretaka og medlemmene tent med, ifølgje utvalet.