Regjeringa skjerper kampen mot datakriminalitet

Regjeringa fremja i statsråd i dag nye lovtiltak mot datakriminalitet, saman med forslag om at Noreg sluttar seg til Europarådet sin konvensjon om kamp mot datakriminalitet.

– Bruken av datateknologi gjer samfunnet meir sårbart enn før, og datakriminalitet kan ramme vesentlege samfunnsinteresser. For å møte desse alvorlege utfordringane er det viktig å tilpasse lovverket til den situasjonen som er i dag, seier justisminister Odd Einar Dørum.

Det er derfor foreslått eit nytt straffebod som vil ramme den som ulovleg sit inne med eller spreier datavirus, hackerverktøy og andre innretningar som er særleg eigna til å utføre straffbare handlingar. Utkastet rammer også den som ulovleg sit inne med eller spreier passord som tilhøyrer andre.

For det andre er det foreslått nye reglar om mellombels sikring av elektronisk lagra data. Utkastet inneber inga generell lagringsplikt, men vil medføre at politiet i den enkelte saka kan påleggje den som tilbyr tenesta og andre å sikre data i inntil 90 dagar om gongen. Dette for å sikre at viktige bevis ikkje går tapt under etterforskinga av ei straffesak.

For det tredje er det foreslått at politiet, under ransaking av eit datasystem, skal kunne påleggje kvar og ein å gi dei opplysningane som er nødvendige for å få tilgang til datasystemet. Politiet skal derimot ikkje kunne krevje at vedkommande skal hjelpe til under sjølve ransakinga.

Regjeringa foreslår vidare at Noreg bør slutte seg til Europarådet sin konvensjon av 8. november 2001 om kamp mot kriminalitet knytt til informasjons- og kommunikasjonsteknologi. Konvensjonen inneheld føresegner både om straff, om etterforskinga og om gjensidig bistand i straffesaker.

Lovtiltaka vil medverke til at Noreg oppfyller pliktene i konvensjonen. Ved å ratifisere konvensjonen medverker Noreg til å styrkje det internasjonale samarbeidet i denne typen saker. Europarådkonvensjonen er det første forpliktande internasjonale initiativet på området, og har fått tilslutning frå USA, Japan og Canada.

Sjå også:  Ot.prp.nr. 40 (2004-2005) Om lov om endringer i straffeloven og straffeprosessloven og om samtykke til ratifikasjon av Europarådets konvensjon 8. november 2001 om bekjempelse av kriminalitet som knytter seg til informasjons- og kommunikasjonsteknologi (lovtiltak mot datakriminalitet).