Betre samordning av lønnstrekk

Justisdepartementet foreslår endringar i tvangsfullføringslova for å sikre betre samordning av lønnstrekk frå ulike namsmyndigheiter.– Reglane skal motverke at skyldnarar får fleire lønnstrekk mot seg som til saman gjer at skyldnaren har for lite igjen av løna til eit rimeleg livsopphald, seier justisminister Odd Einar Dørum.

Det vert òg foreslått reglar om utvida registrering av utleggsforretningar i Lausøyreregisteret. Registrering av utleggsforretningar i Lausøyreregisteret vil gje betre kredittopplysning, og vil medverke til å hindre at resultatlause inndrivingsforsøk vert sett i verk.

Det vert lagt opp til at utleggsforretningar frå ulike namsmyndigheiter skal registrerast i eit sams sakshandssamingssystem. Opplysningar om utleggsforretningane skal overførast elektronisk frå dette systemet til Lausøyreregisteret. Før ein namsmann legg ned eit nytt lønnstrekk, skal han undersøke i sakshandsamingssystemet om det allereie er lagt ned eit lønnstrekk mot ein skyldnar. På denne måten vil ein hindre at det vert lagt ned for mange eller for høge trekk mot ein skyldnar. Ein ventar at talet på saker der det er fleire trekk mot same skyldnar vil verte redusert. Dette vil òg gje ei administrativ besparing for dei trekkpliktige arbeidsgjevarane.

Justisdepartementet foreslår at alle utleggspant, utleggstrekk (lønnstrekk) og avgjerder om at det ikkje er noko å ta utlegg i, såkalla avgjerder om ”inkje til utlegg”, vert registrerte i Lausøyreregisteret. Unntak gjeld for utleggspant i fast eigedom, som ein kan få opplysning om m.a. i grunnboka. I dag er det berre nokre utleggspant som vert registrerte i Lausøyreregisteret. Den utvida registreringa av utleggsforretningar vil gje betre kredittopplysning av nytte for kredittytarar og fordringshavarar. Registreringa vil òg kunne hindre at resultatlause inndrivingsforsøk vert sette i verk.

Dersom det til dømes er nedlagt ei forretning om ”inkje til utlegg”, vil kjennskap til denne gjere at ein annan fordringshavar avstår frå å setje i verk ei ny resultatlaus utleggssak. Dette vil vere kostnadssparande. Av personvernomsyn vil berre enkelte større profesjonelle brukarar, mellom anna bankar, inkassoføretak, kredittopplysningsføretak og offentlige myndigheiter, kunne få direkte tilgang til opplysningar om utleggstrekk og ”inkje til utlegg” i Lausøyreregisteret. Andre vil kunne få tilgang til opplysningane ved å gå vegen om eit kredittopplysningsføretak, dersom dei har saklege behov for det.

Aktuell lenke:

• Ot.prp. nr. 66 (2004-2005) Om lov om endringar i lov 26. juni 1992 nr. 86 om tvangsfullbyrdelse og midlertidig sikring og andre lover.