Statssekretær Berit Øksnes Gjerløw deler ut Olav- og Sunnivastipend i kapellet i Kirkens Hus i dag kl 12.30.

- Stipendordninga skal inspirere dei som sit med kunnskap og erfaringar frå presteteneste og kyrkjeleg rådsarbeid til vidare engasjement i kyrkja. Prosjekta vil òg tene til å vidareutvikle prestetenesta og arbeidet i kyrkjelydane, seier statssekretær Berit Øksnes Gjerløw i ein kommentar.

Olavstipendet går til prestar i Den norske kyrkja. Stipendet består av eit års permisjon med løn i tillegg til eit stipendbeløp. Sunnivastipendet går til personar med bakgrunn frå arbeidet i dei valde råda i Den norske kyrkja. Ved overrekkinga får stipendmottakarane også kvar sin plakett i messing montert på kleberstein frå restaureringsarbeida ved Nidaros Domkyrkje. Statssekretær Berit Øksnes Gjerløw deler ut Olavstipendet til:

• Vikarprest i Finnøy prestegjeld Unni Eikeland, Stavanger bispedømme, for prosjektet: ””Deg å få skoda er sæla å nå?” Gudsbilete i trusforteljingar frå ”bedehusland”. Ei undersøkjing av gudsbilete i eit sokn i nordre Ryfylket, sett i relasjon til den lokale bedehuskulturen som ”symbolsk univers””.

Statssekretær Berit Øksnes Gjerløw deler ut Sunnivastipend til:

• Sekretær og saksbehandlar i Hol prestegjeld Ingjerd Almås Anfinset, Tunsberg bispedømme, for prosjektet: ”Barnekoret som kjerneprodukt i menighetens arbeid”.
• Prosjektleiar i Lier kommune Benita Christensen, Tunsberg bispedømme, for prosjektet: ”Endringsarbeid i kirken. Evaluering av omorganiseringen av de administrative oppgaver i menighetene i Drammen.”

I år kom det inn 15 søknader til Olavstipendet og 6 søknader til Sunnivastipendet.