Nytt publikumsbygg for Nidaros domkyrkje — nedlegging av grunnstein Nytt publikumsbygg for Nidaros domkyrkje — nedlegging av grunnstein Nytt publikumbygg ved Nidaros Domkyrkje - nedlegging av grunnstein
Historisk arkiv
Publisert under: Regjeringen Bondevik II
Utgjevar: Kultur- og kirkedepartementet
Statsrådens tale i Trondheim 24. mai 2005
Tale/innlegg | Dato: 25.05.2005
Kultur-og kyrkjeminister Valgerd Svarstad Haugland
Nytt publikumsbygg for Nidaros domkyrkje – nedlegging av
grunnstein
Statsrådens tale, Trondheim 24. mai 2005
”Kjære alle saman!
Det er gått mange år sidan dei første planane for dette
bygget vart laga. Som mange av dykk kjenner til, var nybygget
opphaveleg ein del av eit større prosjekt, der målet var ei ny
utforming av sjølve Vestfrontplassen. Undervegs i prosessen vart
det store prosjektet delt i to. Vestfrontplassen fekk ei ny
utforming på midten av 1990-talet, men avslutninga, i form av eit
nybygg på nordsida på plassen, er vi først no i ferd med å
sluttføre. Når vi no skal leggja ned grunnsteinen for dette bygget,
er det såleis ikkje berre ein milepæl i reisinga av bygget vi
markerer. Vi markerer òg at vi snart er til vegs ende med den
endelege nyutforminga av Vestfrontplassen.
Det er ei stor ære for meg å få leggja ned grunnsteinen til det nye publikumsbygget, og eg vil få takka alle dei som har vore involverte i byggjeprosjektet, alle dei som kvar på sin måte har del i at bygget no vert reist.
Først vil eg takka Statsbygg, som har byggjeoppdraget. Vedtaket om bygging vart gjort av Stortinget så seint som i juni i fjor. Vi veit at det har vore stilt strenge krav til prosjektleiinga og til framdrifta i prosjektet. Rivinga av dei bygningane som sto her tidlegare måtte gjennomførast på kort tid. Dei arkeologiske utgravingane måtte gjennomførast i løpet av eit halvår. Eg vil takka Statsbygg for godt planleggingsarbeid og god prosjektleiing. Eg vil òg takka Norsk Institutt for Kulturminneforsking, som har hatt ansvaret for dei arkeologiske utgravingane. På kort varsel og på kort tid har dei fått gjennomført utgravingane.
Som vi veit, byggjer vi på historisk grunn og kloss til ei freda og eineståande kyrkje. Å byggja her kan vi ikkje gjera utan at Riksantikvaren følgjer oss tett. Eg vil takka Riksantikvaren for konstruktiv deltaking under heile planprosessen.
Restaureringsverksemda ved Nidaros domkyrkje har vore ein pådrivar i å få bygget ført opp. Eg vil takka Restaureringa for denne pådrivar-rolla. Som eg sa, det har tatt tid å få denne byggjesaka løyst. Eg vil gjerne gi Restaureringa ein del av æra for at bygget no skal reisast.
Ut frå teikningane veit vi korleis nybygget vil sjå ut. Det er forma slik at det er tilpassa sitt monumentale nabobygg: Nidarosdomen. Det skal altså ikkje vera eit praktbygg, men eit funksjonelt bygg, slik at det ikkje tar fokus frå kyrkja. Eg vil takka arkitekt Eggen for det oppdraget han har utført, og for den entusiasmen og det tålmod han har hatt i den tida som har gått sidan prosjektet første gongen vart lansert.
Eg vil òg retta ein takk til
Opplysningsvesenets fond som har vore med i finansieringa av
bygget. Eg ser denne byggesaka som eit eksempel på at staten og
fondet kan gå saman i konstruktive løysingar for å bringa fram gode
resultat. Eg vil takka dei som har representert fondet i denne saka
og stilt opp for ei løysing.
Vi står no framfor ein hektisk byggjeperiode. Statsbygg seier
at bygget er i rute. Det er eg glad for å høyra, og det skal bli
spennande å sjå bygget ferdig om eit år, då Hans Majestet Kongen
skal innvia bygget under kroningsjubileet den 22. juni 2006.
Det er grunnsteinen til eit servicebygg, eit bygg som skal tena publikum, vi skal leggja ned i dag. Eg vil ynskja at bygget kan tena sitt formål. Og det er å gi tilreisande og besøkande til Nidarosdomen ein stad å trekkja pusten og områ seg, for å seia det kort. Men sjølv om det er eit bygg for publikum, må vi tru at det òg er eit bygg som kjem kyrkjelivet her ved Nidarosdomen til gode, ja, at det er eit bygg som kjem heile Trondheim til gode.
Med desse orda vil eg no leggja ned grunnsteinen.