Frivillig virke ein bærebjelke i samfunnet
Historisk arkiv
Publisert under: Regjeringen Bondevik II
Utgiver: Kultur- og kirkedepartementet
Artikkel LO-Aktuelt 31.01.05
Tale/innlegg | Dato: 31.01.2005
Det er imponerande å sjå engasjementet hos nordmenn i etterkant av naturkatastrofen i Asia, skriver kulturminister Valgerd Svarstad Haugland. (LO-aktuelt 31.01.05)
Frivillig virke ein bærebjelke i samfunnet
Frivillige organisasjonar melder om
rekordstore gåveinntekter og folk stiller villig opp som
frivillige. Det viser på mange måtar kor sterkt dei ulike
frivillige organisasjonar står i samfunnet vårt. Dei nyt stor
respekt for arbeidet dei utfører, og folk stolar også på at hjelpa
når fram til dei som treng det mest.
Regjeringa ynskjar i aukande grad å leggja forholda tilrette
for frivillig verksemd. Difor har Kultur- og kyrkjedepartementet
fått eit koordinerande ansvar for frivillig arbeid frå 1. januar
2005. For fyrste gong får frivillig sektor ein eigen
frivillighetsminister. Målet er å betra samordning av den statlege
politikken for frivillig virke, og auka merksemda om verdien av
frivillig arbeid.
Frivillig aktivitet er ei kraft regjeringa meiner
er heilt nødvendig for å skapa eit godt samfunn. Vi ynskjer å
byggja opp samfunnet nedanfrå gjennom familien, nærmiljø,
lokalsamfunn og ikkje minst frivillig sektor. Ulike former for
frivillig innsats er heilt sentrale for at samfunnet skal fungera.
Verken marknaden eller det offentlege klarer å løysa alle
oppgåvene åleine. Frivillige organisasjonar og frivillige initiativ
supplerar og utfyller det offentlege og marknaden. Frivillig virke
skaper engasjement og aktiv deltaking, og deltakarane spelar ikkje
berre ei mottakarrolle som kundar eller forbrukarar.
Frivillige organisasjonar er viktige i kraft av det arbeidet
dei utfører. Mange av dei velferdsordningane som i dag vert drivne
i offentleg regi, starta som frivillig aktivitet. Utan
organisasjonane sin innsats ville ikkje velferdssamfunnet hatt den
utforminga vi har i dag.
Organisasjonane er viktige som demokratiske
aktørar. Dei utgjer eit vernande lag mellom staten og marknaden på
den eine sida, og enkeltindivida på den andre.
Organisasjonane gir meiningsfylte og identitetsskapande
fellesskap. Mange stader er det frivillige organisasjonar som
skaper dei møteplassane som eksisterer utanom jobb og skule.
Frivillig virke kan og vera med på å bryta ned
fordommar og skapa tillit i samfunnet. Framandfrykt stammar ofte
frå mangel på kunnskap. Vi har mange eksempel på at frivillige
initiativ har vore med på å bryta ned fordommar som igjen har endra
lokalsamfunn.
Regjeringa vil stimulera til frivillig innsats gjennom å:
- sikra eit enklare frivillig-Noreg
- arbeida vidare med forslaget om eit frivillighetsregister
- lansera ein nettportal med informasjon om frivillige
verksemd
- driva og etablere arenaer for dialog mellom staten og
frivillige organisasjonar
- vidareføra og utvikla arbeidet med
frivillighetssentralane
Frivillig virke er bærebjelkar i samfunnet, bidrar til eit samfunn med vekt på mangfald, og aukar livskvaliteten. Det har ein eigenverdi at folk ynskjer å gjera ein innsats for andre. Det at menneske gir av tida si og engasjementet sitt til andre eller ei sak dei brenn for er ein positiv verdi vi må støtta opp under!