Ságástallan Árran julevsáme guovddáža 10-jagi ávvudeamis ma??ebargga 24.08.2004

Gonagaslaš allavuohta kruvdnaprinsa Haakon, avvudeaddjit, guossoheaddjit ja guossit.

Munnje lea stuora illun leat dáppe Árran julevsámi guovddáža 10-jagi ávvudeamis. Guovddáš, iežas čáppa hámiin, duođašta nanu sámivuođa dán guovllus. Árran lea deahálaš ásahus dan ektui ahte bisuhit ja ovdánahttit julevsámi kultuvrra, dan dihte go dat lea gávnnádanbáiki gos oktasaš historjá, oktasaš sámi duogáš ja julevsámigiella lea guovddážiš. Mun hálidan dákko bokte rámi addit sidjiide geat leat nu ollu bargan ovddidan dihte Árrana, ja mun dieđan ahte lea sihke eaktodáhtolaš ja profešunella ja nanu fágalaš bargu dán ásahusa ja guovllu ovdáneami duogábealde. Ja bohtosat maid dáppe lehpet joksan, movttiidahttejit ja leat ovdagovvan eará sámi guovlluide geat maid barget dan badjelii ahte seailluhit ja ovdánahttit iežaset sámi kultuvrra lagas birrasiin.

Okta dain deaháleamos vuoruhemiin Ráddehusa sámepolitihkas, lea sámi giella, maiddái julev sámegiella. Árran dahká ge mávssolaš barggu dien dáfus, sihke sámegielat mánáidgárddi, gáiddus samegieloahpaheami vuođđo- ja joatkaskuvladásis ja giellalávguma bokte.

Ráddehus háliida maiddái ahte Norgga álbmot ja stuoraservvodat buorebut galggašii ipmirdit sámi kultuvrra ja servvodateallima. Ja de fertege riekta dieđuid juohkit sámiid birra. Dan dihte leatge ásahan dan n.g. Ofelaš-prošeavtta, gos 3 sámi nuora galget vánddardit ja muitalit sámiid birra, erenoamážit eará nuoraide. Ja okta dan golmma nuoras boahtáge dáppe julevsámiguovllus. Mii vuordit ahte prošeakta lea fárus gilvimen positiiva oainnuid sámiid ektui stuoraservodagas ja nuoraid geardái.

Loahpas hálidan Rađđehusa ovddas sávvat lihku Árrana 10-jagi ávvudeapmái, ja sávan maid lihku din seailluhan- ja ovdánahttinbargui mii guoská julevsámi gillii ja kultuvrii.