Miljømøte med Wangari Maathai

Miljø og fattigdom var tema da miljøvernminister Knut Arild Hareide møtte nobelprisvinnar Wangari Maathai laurdag. -Tildelinga av fredsprisen til Dr. Maathai er ei kjelde til personleg inspirasjon og læring, sa Hareide, da han gratulerte prisvinnaren.

Miljøvernminister Knut Arild Hareide gratulerer Wangari Maathai med Nobels Fredspris. Foto: MD

- Grasrota er dei primære brukarane og vernarane av naturen og skogen. Betre forvaltning av naturen må skje blant dei, meiner Wangari Maathai. Da ho samla kvinner for å plante tre for at dei skulle betre livsvilkåra sine, trudde regimet at dei hadde politiske føremål. Møte med fleire enn ni personar vart derfor forbode. – Da innsåg vi at effektivt vern av miljøet krev demokratisk rom, fortel Maathai.

Maathai er overtydd om at arbeidet med miljøgrunnlaget førebyggjer konflikt. I Kenya var Green Belt Movement med på å hindre valdelege utbrot. I Rwanda vart katastrofen eit faktum.

-Det var også svært labilt i Kenya, men da det var som verst, på starten av 90-tallet, greidde vi å halde stand. Vi heldt talrike seminar, fekk folk til å innsjå samanhengane, og medverka til at folk snakka saman, fortel Maathai.

Kenya sin miljøminister Kalonzo Musyoka og leiaren for FNs miljøprogram (UNEP), Klaus Töpfer var også til stades da Knut Arild Hareide møtte Wangari Maathai på Grand Hotell i Oslo. Det bilaterale samarbeidet mellom Noreg og Kenya er no gjenoppretta og Hareide og Musyoka har allereie drøfta korleis miljøspørsmåla kan fremjast i dette samarbeidet. Godt styresett i naturressurs- og vassforvaltning er mest aktuelt. Miljøminister Musyoka er oppteken av at utarming av naturressursane må inkluderast i omgrepet om og arbeidet for godt styresett.

Klaus Töpfer, UNEP, Wangari Maathai og Knut Arild Hareide. Foto: MD

Å medverke til godt styresett har også førsteprioritet for UNEP. I følgje generalsekretær Klaus Töpfer er dette den mest vitale enkeltfaktor for å oppnå betre forvaltning av naturressursane og oppnå at miljøarbeid aktivt motarbeider fattigdom.

• Miljøvernets rolle i konflikt og fredsbygging, Miljøverndepartementets seminar 08.12.04
• Maathai sin tale ved fredsprisutdelinga (Nobelinstituttet)