Regjeringa vil leggja til rette for auka innovasjon og fleire levedyktige nyetableringar i Noreg. Målet er å styrkja verdiskapinga i framtida gjennom omstilling og utvikling av eit innovativt og kunnskapsintensivt næringsliv. I revidert budsjett er det difor foreslått ei løyving på 15 millionar kroner gjennom det landsomfattande innovasjonsnettverket til SIVA, Selskapet for industrivekst SF.

-I SIVAs innovasjonsnettverk blir det kvart år etablert om lag 200 nye kunnskapsintensive bedrifter, seier nærings- og handelsminster Børge Brende. -For å bidra til at dette talet skal bli enda høgare, legg regjeringa no til rette for at næringslivet i større grad skal prioritera forsking, innovasjon og nytenking.

Etablering av ny verksemd er krevjande, og under halvparten av nye bedrifter overlever dei fem fyrste åra. Tilgang til rådgjeving, nettverk og kapital i den fyrste kritiske fasen er avgjerande.

Tilskotet til SIVA skal styrkja etablering av møteplassar, nettverk og infrastruktur for nyetablerte verksemder. Pengane skal også bidra til auka samarbeid og nettverksbygging mellom FoU-miljø og entreprenørar, etablert næringsliv, finansieringskjelder og andre aktørar. Nettverksarbeid, inkubatorverksemd knytt til sentrale forskingsinstitusjonar og Norwegian Centres of Expertise (regionale innovasjonssenter) er prioriterte tiltak.

Regjeringa legg til grunn at nettverksbygging og samarbeid mellom bedrifter, kunnskapsmiljø og andre aktørar i dei ulike verdiskapingsmiljøa bidrar til utveksling av idear, erfaringar og resultat, noko som igjen fører til nye moglegheiter og auka innovasjon.

-Vedlikehald og vidareutvikling av innovasjonsnettverket og tilhøyrande program er difor av stor verdi for verdiskapinga og for å sikra velferdssamfunnet vårt i framtida, seier Brende.

I 2004 var det rekordmange 28 000 nyetableringar i Noreg. Dette representerer ein auke i nyetablerte føretak på 18% frå 2003. Regjeringa meiner at det likevel er eit potensial for auka innovasjon og fleire levedyktige nyetableringar i Noreg.