Fire millionar til Næringslivets Idéfond

Regjeringa har i statsbudsjettet for 2005 sikra at Næringslivets Idéfond for NTNU får fire millionar kroner i støtte for å vidareføra fondet i 2005.

– Regjeringa går inn med pengar fordi me ser svært positivt på Idéfondets arbeid. Dei oppnådde resultata passar godt inn i Regjeringas mål for innovasjon og kunnskapsbasert næringsutvikling, seier næringsminister Børge Brende.

Næringslivets Idéfond for NTNU blei etablert i 1998 for å stimulera fagleg nyorientering og tverrfagleg forsking ved NTNU, i nært samarbeid med næringslivet. 17 norske bedrifter har bidratt med til saman 55 millionar kroner til fondskapitalen.

Ei evaluering som blei gjennomført hausten 2003 syner at Idéfondet langt på veg har lukkast med langsiktig kunnskapsutvikling på strategiske område. Dette er område der næringslivet er i posisjon til å gjera kunnskapen om til konkurransedyktig verksemd. Programmet har så langt skapt nye, næringsrelevante undervisningstilbod ved NTNU, og resultata av forskinga er til dels teken i bruk i næringslivet.

Når regjeringa no går inn med fire millionar kroner til fase II av prosjektet er det fordi Idéfondet har vist seg som eit effektivt tiltak for å utvikla relasjonane mellom næringslivet og kunnskapsmiljøet ved NTNU. Idéfondet har også styrka kommersialiseringsarbeidet ved universitetet. Samtidig bidrar fondet til å utløysa nye forskingsmidlar frå næringslivet.

Næringsminister Børge Brende meiner dette er ei klok satsing. –Vegen frå idé til kommersiell suksess skal bli kortare, og det treng me i Noreg. Det er viktig for den framtidige verdiskapinga at forskingsresultat i større grad blir kommersialiserte og gjort om til næringsverksemd.

Idéfondet har skissert seks satsingsområde for det vidare arbeidet:

• Olje og gass,
• Maritim verksemd
• Energiproduksjon, distribusjon og forbruk
• Havbruk og kystsoneutvikling
• IKT
• Metallurgisk og mekanisk verksemd

Støtta frå regjeringa blir gitt under føresetnad av at Idéfondet kan sikra eit tilsvarande beløp frå næringslivet.

Les meir om Idéfondet her: http://www.idefondet.ntnu.no/

-Vegen frå idé til kommersiell suksess skal bli kortare, seier statsråd Børge Brende.

18. januar 2005