Regjeringa har i statsråd i dag gjort framlegg om å opne for førehandsinnkrevjing av bompengar for å finansiere planlegging av ein del vegprosjekt i Rogaland. Planlegginga gjeld prosjekt som inngår i den såkalla ”Ryfylkepakka”.

Utgiftene til planarbeidet er rekna til om lag 24 millionar kroner. Av dette beløpet gjeld 16 millionar kroner planlegging av Ryfylkesambandet, det vil seie eit prosjekt på riksveg 13, med undersjøiske vegtunnelar mellom Solbakk i Strand kommune og Hundvåg i Stavanger kommune og mellom Hundvåg og E39 i Stavanger. Dessutan skal 7 millionar kroner nyttast til planlegging av fastlandsamband til Finnøy, medan til saman ein million kroner går til arbeid med planar for utbetringar på riksveg 13 og planar for utbygging av fylkesveg 992 Espedal – Frafjord.

- Betre kommunikasjonar er nødvendig for å fremje vidare vekst og utvikling i Ryfylke. Det er derfor gledeleg at det på lokalt hald er så stor interesse for å få fram prosjekt som kan føre til store forbetringar for folk og næringsliv. Fleire av prosjekta vil gi store innsparingar for transport av gods og personar, mellom anna i form av reduserte utgifter til ferjetransport. Eg har også merka meg at det på lokalt hald er brei oppslutnad om å ta i bruk førehandsinnkrevjing av bompengar for å finansiere planlegging av viktige vegprosjekt, seier samferdselsminister Torild Skogsholm.

Det blir lagt til grunn at førehandsbompengane skal krevjast inn som eit påslag i ferjetakstane i tre ferjesamband i området.

Innkrevjing av bompengar i det sørlege Finnøysambandet mellom Rennesøy og Finnøy og Finnøy, Fogn og Talgje skal finansiere planlegginga av fastlandsamband til Finnøy. Det er rekna med at ferjesambandet mellom Finnøy og Rennesøy skal leggjast ned når eit eventuelt fastlandssamband opnar for trafikk.

Innkrevjinga av førehandsbompengar i ferjesambanda Stavanger – Tau og Lauvvik – Oanes skal finansiere planlegginga for dei andre prosjekta. Det blir lagt til grunn at desse to ferjesambanda skal leggjast ned når Ryfylkesambandet eventuelt opnar for trafikk.

Dette er venta at innkrevjinga av bompengar vil føre til årlege inntekter på om lag 12 millionar kroner. - Bompengane vil dermed etter to til to og eit halvt år dekkje dei utgiftene som ein no reknar med å bruke til planlegging av vegprosjekta, heiter det i framlegget frå regjeringa.

I framlegget blir det vist til at Samferdselsdepartementet har merka seg at det ved den lokalpolitiske handsaminga av Ryfylkepakka vart lagt til grunn vesentleg større investeringar i perioden 2002-2011 enn det som ligg inne i handlingsprogrammet for denne perioden. Samferdselsdepartementet finn difor grunn til å framheve at nivået for dei statlege investeringsrammene vil bli vurdert i samband med revisjonar av Nasjonal transportplan, i første omgang for perioden 2006-2015.

Samferdselsdepartementet understrekar at det ikkje blir lagt opp til at Stortinget skal ta stilling til heile Ryfylkepakka no. Departementet vil komme tilbake til Stortinget etter kvart som det ligg føre akseptable finansieringsopplegg og tilfredsstillande plangrunnlag for dei einskilde delprosjekta, går det fram av framlegget frå regjeringa.

Til redaksjonen
For fleire opplysningar – sjå:
linkdoc138018#docSt.prp. nr. 1 Tillegg nr. 2 (2002-2003) Om omdanning av Luftfartsverket til aksjeselskap og om Flytoget AS, BaneTele AS og Ryfylkepakken