Statsministeren og statsrådane har normalt desse faste postane i vekeprogrammet: regjeringskonferanse på Statsministerens kontor måndag og torsdag kl. 12.15, og Statsrådet sitt møte på Slottet fredag kl. 11.00.

Laurdag 13. mars:
Statsministeren deltek i KrF sitt landsstyremøte, på Radisson SAS Scandinavia Hotel i Oslo.

Sundag 14. mars:
Frå sundag 14. mars kl. 18.00 til tysdag ettermiddag 16. mars leiar statsministeren den første drøftinga i regjeringa av statsbudsjettet for 2005, på Thorbjørnrud Hotell på Jevnaker. Det er høve til å fotografere idet regjeringa kjem til Thorbjørnrud frå omlag kl. 17.15. Pressekontakt er statssekretær Gunnar Husan, telefon 91 12 12 16.

Måndag 15. mars:
Kl. 13.00 held statsministeren og finansministeren pressekonferanse om budsjettarbeidet for 2005, på Thorbjørnrud Hotell på Jevnaker. Pressefolk er velkomne til lunsj frå kl. 12.00.

Onsdag 17. mars:
Kl. 10.45 tek statsministeren imot den belgiske statsministeren, Guy Verhofstadt, på Statsministerens kontor. Det er høve til å fotografere. Verhofstadt er denne dagen på gjesting i Oslo, sjå eiga melding om dette.
Omlag kl. 12.00 er statsministrane Bondevik og Verhofstadt tilgjengelege for pressefolk, på Statsministerens kontor.
Kl. 12.45 er statsministeren vert for ein lunsj i høve Verhofstadt si gjesting i Oslo, i gjestebustaden Parkvegen 45. Det er høve til å fotografere ved innleiinga.

Fredag 19. mars:
Fredag 19. og laurdag 20. mars er statsministeren i Ålesund og Geiranger. Pressekontakt er politisk rådgjevar Øistein Mjærum, telefon 95 21 48 41.
Kl. 11.00 gjestar statsministeren Sperre Industri AS i Ålesund.
Kl. 13.30 møter statsministeren, næringsministeren og landbruksministeren næringslivsleiarar frå Møre og Romsdal og Sogn og Fjordane, på Radisson SAS Hotel i Ålesund. Det er høve til å fotografere ved innleiinga.
Omlag kl. 15.30 er statsministeren og andre deltakarar i møtet tilgjengelege for pressefolk same staden.
Kl. 16.30 er statsministeren vert for ein middag i høve møtet med næringslivsleiarar, på Radisson SAS Hotel i Ålesund.
Om kvelden reiser statsministeren til Geiranger, i høve årsmøtet i Møre og Romsdal KrF.

Laurdag 20. mars:
Kl. 11.15 talar statsministeren på KrF Møre og Romsdal sitt årsmøte, på Union Hotel i Geiranger.
Om ettermiddagen reiser statsministeren attende til Oslo.