Pressemelding

6. juni 1997

Lovutval skal greie ut organiseringa av børsen

Finansdepartementet har sett ned eit lovutval som skal greie ut ulike modellar for å organisere børsverksemd i Noreg. Advokat Marius Ryel, Oslo skal vere leiar.

Noko av bakgrunnen er forventningar om auka konkurranse i åra framover med omsyn til omsetnad av verdipapir. Det er Oslo Børs som har kome med forslag om ein slik utgreiing.

Utvalet skal vurdere kva for oppgåver ein børs bør ha, mellom anna i kva for grad børsen skal ha forvaltningsmynde. Utvalet skal óg vurdere korleis det skal førast tilsyn med børsen si verksemd. Det skal óg takast omsyn til kva tilhøva internasjonalt i børs og verdipapirmarknadene har å seie for børsen.

Med i utvalet er det representantar frå Kredittilsynet, Oslo Børs, Norsk Opsjonssentral AS, Norges Fondsmeglerforbund, Den norske Bankforening/Sparebankforeningen i Norge, Norges Bank, Verdipapirsentralen, Næringsdepartementet og Finansdepartementet.

Utgreiinga skal vere avslutta seinast innan 31. desember 1998.

Medlemar i utvalet

• Advokat Marius Ryel, Oslo (leiar)
• Ekspedisjonssjef Jan Bjørland, Oslo
• Avdelingsdirektør Eirik Bunæs, Oslo
• Børsdirektør Kjell Frønsdal, Bergen
• Finansdirektør Mai-Lill Ibsen, Oslo
• Administrerande direktør Per Broch Mathisen, Drøbak
• Direktør Norunn Dale Seland, Oslo
• Ekspedisjonssjef Asta Tjølsen, Ringerike
• Rådgjevar Britt Fjogstad Selnes, Oslo
• Administrerande direktør Bjørn O. Øiulfstad, Oslo

Mandatet

Utvalet skal greie ut alternative modellar for organisering av børsverksemd.

Utvalet skal ta utgangspunkt i at det er behov for ein effektiv og velorganisert marknadsplass i Noreg. Alternative modellar for organisering av børsverksemd skal vurderast ut frå den konkurransesituasjonen som ligg føre og den konkurranse som i framtida kan ventast mellom ulike lands marknadsplasser. Utvalet skal ved desse vurderingane ta omsyn til kva dei konkurransemessige endringar reglane i EØS-avtalen som svarar til investeringstjenestedirektivet, og nasjonal gjennomføring av desse, vil innebere når det gjeld meglertenester. Utvalet skal óg ta omsyn til kva den teknologiske utviklinga vil ha å seie for utviklinga av børsverksemd, mellom anna problemstillingar knytt til grensekryssande verksemd.

Utvalet skal vurdere kva alternative organisasjonsmodellar bør ha å seie med omsyn til kva for oppgåver ein børs kan dekkje, mellom anna kontrollkompetanse og regelkompetanse. Utvalet skal vidare vurdere kva for konsekvensar ulike modellar bør ha for tilsynet med en børs sin verksemd.

Utvalet skal greie ut dei regelendringar som i hovudtrekk vert sett som naudsynte for å settje i verk alternative modellar for organisering av børsverksemd.

Utvalet skal greie ut dei økonomiske-administrative konsekvensane av dei forslag som vert fremma.

Finansdepartementet kan gjere endringar, utdypingar og gje tillegg til mandatet.

Informasjonssjef Anne-Sissel Skånvik, tlf: 22 24 41 09, priv: 66 78 77 96, personsøkjar: 966 24871