Ny internkontrollforskrift: Enklare for små verksemder
Historisk arkiv
Publisert under: Regjeringen Jagland
Utgiver: Kommunal- og arbeidsdepartementet
Pressemelding | Dato: 06.12.1996 | Sist oppdatert: 21.10.2006
Pressemelding
6.12.96
Ny internkontrollforskrift:
Enklare for små verksemder
Forskrifta om systematisk helse-, miljø- og tryggleiksarbeid i verksemder (internkontroll) er fastsett i statsråd i dag. Den nye forskrifta har fått enklare språk og struktur enn den gamle.
- Forskrifta er betre tilpassa situasjonen til små og mellomstore verksemder, og er retta mot forbetringsarbeid i verksemdene. Det har dessutan vore viktig å få klårare fram kor viktig det er at arbeidstakarane medverkar, seier kommunal- og arbeidsminister Kjell Opseth.
Forskrifta avløyser forskrift om internkontroll frå 1992, og er utarbeidd av Kommunal- og arbeidsdepartementet i samarbeid med Miljøverndepartementet, Barne- og familiedepartementet og Justisdepartementet.
Forskrifta slår fast at den som er ansvarleg for verksemda, skal innføre og utøve systematiske tiltak for å etterleve gjeldande krav i arbeidsmiljølova, forureiningslova, brann- og eksplosjonsvernlovgjevinga, produktkontrollova, sivilforsvarslova og lov om tilsyn med elektriske anlegg og elektrisk utstyr. Dette skal gjerast i samarbeid med dei tilsette i verksemda. Revideringa av internkontrollforskrifta er eit ledd i ei breiare oppfølgjing av internkontrollreforma, som vart gjennomført i 1995. Evalueringa viste at arbeidet med innføring av internkontroll er kome for kort.
Lagt inn 6 desember 1996 av Statens forvaltningstjeneste, ODIN-redaksjonen